Addis Ababa:- Sidaamu Qoqqowira tayxe diro harinsanni hee’noonnihu haanju harumi loosi kaajje sufanni noota Qarqaru, Dubbunna Diilallote Gade Soorro Biiloonyi Xawisino.
Qoqqowu Qarqaru, Dubbunna Diilallote Gadi Soorro Biilloonyi Dubbu Latishshi, Agarooshinna Horoonshi Dayrektoreete Dayrekterichi Kalaa Abrahaam Alaakihu Bakkalcho Gaazeexira xawisino garinni; tayxe qoqqowu deerrinni haanju harumi looso baxxino garinni loonsanni hee`noonniha ikkanna; xaano chigginyete kaashshi kaajje sufanni noota buuxisino.
Kalaa Abrahaami xawishshi garinni; sa`u lame lamalara mite mite woraddara xeenu anje kalaqanteenna kaasate harinsho taxxi yitinoha ikkanna; xa tenne yannara xeenu wirro baalankawa dayeenna qufichu noo daafira chigginyete kaasa kaajjite suffino.
Tayxe diro hananfoonnihu haanju harumi loosi amandoonni mixo garinni xaa geeshsha ikkadu garinni gumulamanni nootanna uurrinshuwa gattukkinni chigginye kaajjishshe kaassanni noota huwachishino.
Tayxe diro Biilloonyu widoonni calla mixo amandoonniti 153.4 miliyoone chigginye kaasate ikkanna; 148.8 miliyoone chigginye kaanse xibbuunni 97% gumulloonni. Qoqqowu Irshunna Kalaqamu Jiro Biiro widoonni kaasantino chigginye lendiro qoqqowaho 360 miliyoone ale ikkitannota gumula dandiinoonnita huwachishino.
Xaphoomunni lamente biiro widoonni chigginyetenni diwantino baatto 60 kumi ali heekitaare ikkitannota xawinsoonniha ikkanna; gattino hawadi yanna giddo konni ale baatto chigginyteenni diwate jawaante loonsanni hee`noonnita egensiisino.
Qoqqowoho, baxxinohunni tayxe diro haqqa sammi yine kaansoonnikkitanna gummate laalora ikkitannota Awukaado, Maango, zaytoonenna Apile bande kaansnoonni yiino. Wole widoonni, qarqaru agarooshshira horo uytannore Waadde, Hengedde baadiyyete Hooncho, Daadakkonna lawanno haqqa kaansoonnita Kalaa Abrahaam egensiisino.
Qoqqowu deerinni haanju harumi pirogiraame hananfinkunni jawa soorro dagginota buuxise; albaanni moolletenni mulluugicho ikkitino qooxeessuwa; lawishshaho;- Borrichu, Alatta Cuukko, Lokka Abbaayyu, Daarra hattono Hawaasi gaangaawi woraddanna wolootu aana chigginye latte diilalote gadi soorro xiiwo dandiitenna ba’ino bu`ano burqa dandiitinoha ikkanna; xeenuno yanna agadhinohu gananni nootanna dagano horaameeyye ikkitanni noota qummeessino.
Abrahaam Saamueel
Bakkalcho Maaja 27 , 2015 M.D
