Qoqqowoho Turizimete Handaarinni 3 Biliyoone Ale Eo Afi`noonni

 Hawaasa:- Xibbuunni 25% ikkitannota turizimete jiro calla horonsi’ratenni 3 biliyoone birri ale eo afi`noonnita Sidaamu Qoqqowi Budu Turizimenna Ispoortete Biiro egensiissu. 2015 baajeettete dirinni 4.5 miliyoone gobbayiditinna gobbate giddo turiistooti qoqqowo da”aattino.

Biirote Laynki Sooreessinna Daa’’attoete Handaari Sooreessi kalaa Abbebe Marimo Itophiyu pireesete uurrinshara xawisino garinni; Sidaamu qoqqowi kalaqamu ofollosinninna injiitino diilallote gadi kaiminni kalaqamunna dagoomu budira dhagge ikkitino luphiima daa’’attote jiro noosi. Tenne jiro Daa’’attote Industireranna jirote widira soorrate gawalote latishsha loosanna jiro owaantete widira soorra xa`manno.

Kalaa Abbebe xawishshi garinni; Sidaamu qoqqowo ikke tantanami gedensaanni daa’’attote handaara haaru garinni tantanate hayyo seeranna wodho qixxeessine loonsoonni. Kalqoomu daa’’attote dikko hedote giddo woratenninna gobbate giddo daa’’atto lamunku uminsa akatoomi noonsahura konne kaima assatenni latisate dandiisiisanno looso gumulloonni.

Xaa yannara xibbuunni 25% ikkannoha qoqqowu daa’’attote gawalo xibbuunni 80% iillishate loonsanni hee`noonni. Konne assate qoqqowoho noota dagoomitte paarke, gaxigalu saada heedhanno bayichubba, budu bayichubba, ilaalla garunni da”aattote iillo assa hasiissanno yiino.

Kalaa Abbebe xawishshi garinni; 2015 baajeettete dirinni 4.5 miliyoone meddi yitanno gobbayidinna gobba giddoti da”aattaano qoqqowo da”aattino. Itophiya eanno gobbayidi daa’’ataano giddonni qoqqowo luphiima kiiro noose da”aataano e’inoha ikkanna; gobbate giddo daa’’atto yanna yannatenni lexxitanni no.

Daa’’attote handaarinni 102 kume ikkitanno qansootira loosu kaayyo kalaqa dandiinota kalaa Abbebe; loosu kaayyo kalanqoonnihu xibbuunni 25% ikkannoha calla turizimete jiro horonsiratenniiti yiino.

Xa noota daa’’attote jiro xibbuunni 80% horonsi’ra dandiiniro miliyoonetenni kiirranni loosu kaayyo kalaqantannota coyi`rinohu kalaa Abbebe: turizimete dikko lossate da”aataano keeshshitanno yanna seedisate Hawaasi quchumira hala`ladda gawalote bayichubba loonsanni hee`noonnita egensiisino.

Qoqqowo da”aattino turisootinni 50 kume ikkitannoti gobbayidi daa’’ataano ikkitanna gattinori qole gobbate giddo daa’’ataano ikkansa xawisino.

Abbebech Maatewoos

Bakkalcho  Maaja 27 , 2015 M.D