Addis Ababa:- Shekkeeretenna Kolleeru xissuwa taraawo bikki lexxinota Fayyimmate ministire egensiissu. IFDR Fayyimmate minister Dieeti Dr. Derejje Duguma xawisino garinni; taraawo Itophiyaho calla ikkikkinni kalqete deerrinnino lexxitino gede kayisinoha ikkanna; sai dirinni heewinsiro 15 miliyoonenni luphi yaasi leellishshanno.
Itophiyaho moollete yannara kalaqantino qarrubbanna hawadu ledo amadisiisame xeenu waa kuussanno bayichubba heera Shekkeeretenna Kolleeru xissuwa taraawo lexxitanno gede qara korkaataati yiino. Wole taraawote lexxora korkaata ikkinohu ga`labbote qarri noonsa qooxeessubba aana ranke iillatenni uurrisa hooga ikkasi coyi`rino.
Wole widoonni Kolleeru onte qoqqowubbara kalaqamasi coyi`rinohu Ministir Dieetu; Oromiyaho, Soomaaletenna Sidaamu qoqqowubbara taraawo uurrisa dandiinoonnitano xawisino. Gattino qoqqowubbarano gargadhate looso gumullanni hee`noonnita buuxise; xaa geeshsha 2 miliyoone ale kittiwaate uyinoonnita coyi`rino.
Daramaano qansooti noo bayichubbara taraawo hala’litannokki gede baxxino illachinni loonsanni afammannita lede xawisino. Shekkeerete xagichi shiqisho qarri dino yiinohu Dr. Derejje Dhuguma; tuqishshu ledo amadisiisame kayinni mite mite bayichubbara xe`ne kalaqantinota kayisino. Taraawo uurrisate baalanti hajo la`annonsa bissa qeechansa fultanno gede Ministir Dieetu woshshatto shiqishino.
Abbabech Maatewoos
Bakkalcho Maaja 27 , 2015 M.D
