Addis Ababa:- Laynki Ruusiyu-Afriku songo duuchu handaari dipilomaase gummaame ikkitinota Mootimmate Komunikeesshine Owaanteministir Dieetitte dukko Selaamaawit Kaasiti xawissu.
Xaphoomu ministirchi Dr.Abiy Ahimedinna Ruusiyu pirezidaantichi Vilaadimir Putini, Ruusiyu-Afriku dipilomaasete, budunna poletiku xaadooshshensa kaajjisha hasiissannota gutunni sumuu yitinota Minister Dieetitte egensiissino.
Minister Dieetitte Selaamaawiti xawishshisenni; Ruusiyu-Afriku gobbuwa miinjunna mannihimmate hajubba songo Itophiyu latishshu loossanni maareekkisiissinota illete leeltanno gumma egensiissino bare ikkase kayissino.
Afriku daga sagaletenni umonsa dandaate assitanno wo`naalsha Ruusiyu tekinoloojete shiqishonni irkissanno gede woshshatto shiqishshinohonna handaaru uurrinshuwa duuchu handaari sumimme malaatissinoho yitino.
Xaphoomu ministirchi Dr. Abiy Ahimed massagantino Itophiyunniti soqqamaano gaamo Ruusiyaho assitino keeshshonni pirezidaant Vilaadmiir Putini ledo gummaamo hasaawa assitinotanna loosu widira soorrantanno sumimmeno malaatisansa kultino.
125 dirrara sufinoha lamente gobbuwa dipiloomaasete xaadooshshe miinjittetenna dagoomittete handaarranni roore kaajjisha dandiisiissanno hajubbano hasaawu bisootinka yitino Ministir Dieetitte. Songote aana Itophiyunnita babbaxxitino uurrinshuwa riqibbino massagaano Ruusiyu darawonsa ledo lamente gobbuwa xaadooshshe kaajjisha dandiisissanno hasaawubba assansano coyidhino.
Lawishshaho, keerunna ga`labbote, tekinoloojete, miidiyunna komunikeeshiinete halamme kaajjisha dandiinanni hajubba daafira maltinota xawisatenni; lamente gobbuwata kaajjado dipiloomaasete xaadooshshe miinjunni luphi yino deerrira tareessa dandiisiissanno sumimmuwa malaatisansaati Ministir Dieetitte kayissinohu.
Kalqete deerrinni baxxinohunni Nadaajete waagi iibbabbanna giwirinnu uduunni qarrubba tirate Ruusiyu Afriku ledo jawaatte loossanno gede woshshatto shiqqinotano kayissino. Laynki Ruusiyu-Afriku miinjunna mannihimmate hajubba songo Maaja 20-21/2015M.D Ruusiyu Qullaawu Pitersbergi quchumira harinsoonnita anfoonni.
Abbebech Maatewoos
Bakkalcho Maaja 27 , 2015 M.D
