Addis Ababa:- Sidaamu qoqqowira gumulamihu 2015 baajeettete dirinni assinoonni buuxonni 114 rosu tajubba kaphunnita ikkase buunxoonnita Qoqqowu Pablik Serviisetenna Mannu Jiro Latishshi Biiro egensiissu.
Biirote sooreessi kalaa Asaffi Gurraachihu Itophiyu pireesete uurrinshara xawisino garinni; qoqqowoho gumulamihu 2015M.D assinoonni buuxonni 88 rosu hattono 26 COC xaphoomunni 114 rosunna qajeelshu tajubba kaphunnita ikkitinota buunxoonni.
Loosaasine gaamate, deerru lophonna basete soorro assate hattono babbaxxitino horo agarsiisate ragaanni deerru deerrunkunni afantanno loosu minnanni konni dirinni calla shiqqinori 2 kume 121 tajubba mereerinni 752 tajubba seerimale abbinoonnita ikkase buunxe gargarroonnita Sooreessu egensiisino.
Lawishshaho, Ciroone woradinni calla 27 seerimale doogonni loosaasine qaxarroonnita iilline gumulantannokki gede assinoonni yiinohu kalaa Asaffi; rosu tajubbansa kaphunnita ikkitinota buunxe iillinoonnire seeru garinni la’ne qaafo adhinanni gede Qoqqowu Farcote Biirora sayinse uyne muro agarranni hee’noonnita coyi’rino.
Seerimale doogonni loosaasine qaxarate assooti hiittenne loosu minnarano gumulamannota qummeessinohu Biirote sooreessi; loosaasine gaamate, basete soorro, deerru lophonna babbaxxitino horo agarsiisate loossa seeru garinni calla gumulama hasiissannota huwachishino.
Biirote sooreessi kalaa Asaffi xawishshi garinni; mite mite loosu minna loosaasinete babbaxxitino horo agarsiisate loossara hasiissannota rosunna loosu gade tajubba garunni maareekkite Biironkera egensiissukkinni qooxeessinsara afantanno Womaashshu borro minna ledo hasaabbe halaalaanchimma buunxoonnikki rosu tajenni baatooshshe baantanni gede assitanno
Amsaalu Felleqe
Bakkalcho Maaja 27 , 2015 M.D
