Addis Ababa:- Hawaasi quchumira 1.8 biliyoone birra kaapitaale maareekkisiissinori kiirotenni 40 dureeyyera haaronna halashshote fajjo uynoonnita Quchumu Investimentete Halashsho Borro mini egensiisi.
Hawaasi quchumi Investimentete halashsho borro mini sooreessi kalaa Taaddese Fiqire Itophiyu pireesete uurrinshara xawisino garinni; quchumaho gumulamihu 2015 baajeettete dirinni calla Investimentete halashshonna haaro fajjo xa’midhino pirojekituwara fajjo uynoonni.
Diru giddo halashshotenna haaro fajjo xa’midhino dureeyye kiirotenni 40 ikkitanna; 1.8 biliyoone birra kaapitaale maareekkisiissinore ikkansano xawisino. Konninni, 4 kumenna 100 ikkitanno qansootirano uurrinshunni loosu kaayyo kalaqantinota qummeessino.
Quchumaho xaa yannara xaphoomunni 817 dureeyye babbaxxitino Investimentete handaarrani bobbakke afantannota coyi’rinohu kalaa Taaddese; kuri mereerinni 159 Industirete, 280 ale babbaxxitino owaantete handaarinni, 311 konistiraakishiinete hattono 50 ale ikkitannori quchumu giwirinni handaarranni bobbakkinoreeti.
Laashshaano Industirra xaano quchumaho hala’ladunni loosu giddora e’anni nootanna qansootaho kalaqqannoti loosu kaayyono hala’litanni dagginota qummeessinohu kalaa Taaddese; muli yanna giddono ‘’Shalom HealthCare Solution’’ yaamamannohu Kanaadu kubbaaniyi xaginaatu horora ikkanno uduunne laashshate 250 miliyoone Ameeriku doolaare kaapitaale maareekkisiise bayicho adhinota xawisino.
Konni kubbaaniyinni calla 5 kumi ali qansootira loosu kaayyo kalaqantannota coyi’rino. Kalaa Taaddese xawishshi garinni; woluno Israeelete gobba dureessichi Shaaloom Qulxu’me Ceatto Mereersha yaannohunni ijaarate fajjo xa’minohura 10 hekitaare baatto uynoonni. Muli yanna giddono ijaarsha hanafannoha ikkasi egensiisino.
Quchumaho xaa geeshsha hala’ladda Investimentuwa baattote aana loonsoonnita kulinohu Sooreessu; albillicho kayinni Hawaasi Garbi aana babbaxxitino Investimente halashshate xiinxallo assinoonnitanna loosu giddora e’nannita kulino. Kunino, quchumunna qooxeessu roorenkanni latannonna dureeyyeno jironsa lossidhanno hattono qansootaho ledotenni loosu kaayyo kalaqate dandiisiisannota qummeessino.
Hallanyu handaara jawaachishatenna qansootaho loosu kaayyo kalaqatenni quchumaho loosu hoonge qarra tirate kaa’lannotano coyi’rinohu kalaa Taaddese; xaano ikkiro Investimentete kaayyo quchumaho hala’ladunni noota kule; 100 hekitaare ale ikkitanno baatto babbaxxitino Investimentete handaarranni bobbakkannorira qixxeessinoonni yiino.
Ikkollana, 26 dureeyye Investimentete su’minni baatto adhitu gedensaanni seeda dirrara huxxite worte agurtinore xiinxallotenninna harunsotenni buunxoonniha ikkanna; Investimentetenna baattote Liize lallawi garinni taashshote qaafo adhinanni gede Quchumu Investimentete Halashsho borro mini buuxe Qoqqowo mootimmara egensiisino. Muli yanna giddono gumulo sayinsanni yine agarrannita coyi’rino.
Quchumu ga’labbo teessinowanna hasiissannota safote latishshuwa halashshinoonniha ikkasinni gobbate giddonni ikko Baara widi dureeyyenni roorenkanni hasamannoha ikka dandiinota lede qummeessino.
Amsaalu Felleqe
Bakkalcho Maaja 27 , 2015 M.D
