Addis Ababa:- Kalqete Baanke gobbate ha’nuru miinji woyyeesso irkisate widoonni hegersino dilaali nooseta Xaphoomu Ministirichi Dr Abiy Ahimedi xawisino. Xaphoomu Ministirichi Abiy, tenne lamalara Kalqete Baanke Pirezidaante Ajahi Baangi borrosi mine haa`re hasaawisino.
Xaphoomu Ministirichi Abiy Ahimedinna Kalqete Baanke pirezidaantichi ledo daggino gaamosi xaphoomunni Itophiyu gobbate giddoha ha’nura miinja woyyeessate hajo aana xawishsha assino.
Xaphoomu Ministirichi Abiy Ahimedi (Dr), “Kalqete Baanke Itophiyu ledo noose halamme halashshatenni miinju lophora konseshinaale fayinaanse, kalqoomu fayinaansete korporeeshine widoonni kaajjado Investimentete fayinanse shiqqo heedhanno gede dilaalu noose” yiino.
Ajayi Baangi isi widoonni; gobbate giddonna kalqoomu deerrinni haammata jifo heedhurono; Itophiyu qara qara ikkino latishshi timora uyno illacha naadino. Kalqete Baanke Pirezidaantichi Ajay Baangi, lamu barri towaanyora sa’u barrubbara Itophiya dayinoti qaangannite.
Xaphoomu Ministirichi Abiy Ahimedi Kalqete Baanke Itophiyu ledo noose halamme halashshatenni miinju lophora liqoote asale ajishate fayinansenni kalqoomu faynaanse korporeeshiine widoonni kaajjado Investimentete faynaanse shiqqonna gobbate giddo miinja woyyeessate ajandanke irkisannohanna albillicho sufanno dilaali noonke yee borreessino dagittete qoolira.
Kalqete Baanke Pirezidaantichi Ajayi Baangi Itophiyaho assino keeshshonni addi addita Industirete paarkuwa towaanyo assino. Wole widoonnino, Xaphoomu ministirchi Abiy Ahimed (D/r) Wodiidi Afriki Gobbayidi hajo ministircho Nealeed Pandoori ledo lamooshshu hajubba aana hasaawa assino.
Xaphoomu ministirchi Abiy Wodiidi Afriki Gobbayidi hajo ministircho borrosi mine koyse hasaawisi yannara lamente gobbuwaha xaadooshshe roorenkanni woyyeessate dandiinanni hajubba aana torbitinota buunxoonni.
Hasaawinsa lamente gobbuwaha dipiloomaasete xaadooshshe woyyino deerra tareessate illachishinoha ikkanna; miinjunna daddalu xaadooshshe lossate, sayinsenna tekinoloojete rosi hajubba aana ha`lamate hattono gobbuwatenna kalqoomu gutu latishshi hajubba aana loosate illachishinoha ikkasi xawinsoonni.
Gambooshshu gumulama harunseno Xaphoomu ministirchi borro mini hoowera Xaphoomu ministirchi Dr. Abiy Ahimed; Wodiidi Afriki Gobbaydi hajo ministircho Naaleedi ledo chigginye kaasino.
Hasaawunna chigginye kaasate harinsho aana Laynki Xaphoomu ministirchinna Gobbayidi hajo ministirchi Kalaa Demmeqe Mekonnin hattono Xaphoomu ministirchi Gobbayidi hajo xaadooshshinna poolisete amaalaanchi ministirchi Ambaasaadder Taayye Atsiqesillaase afamansa buunxoonni.
Gaazeexu Odeessaanchinni
Bakkalcho Maaja 27 , 2015 M.D
