Addis Ababa:– Sidaamu qoqqowira fayyimmate uurrinshuwa halashshatenninna isilanchimma noosi owaante aatenni xaa yannara qoqqowunnita fayyimmate diwo xibbuunni 74% iillisha dandiinoonnita Qoqqowu Fayyimmate Biiro egensiissu.
Qoqqowu Fayyimmate Biiro Laynki Sooreessinna xaginaatu owaantubba handaari sooreessi kalaa Yohaannis Latamo Itophiyu Pireesete Uurrinshara xawisino garinni; qoqqowoho fayyimmate owaante horonsi’raanchimma lossate; baxxinohunni, dhibba balanxe gargadhate hayyo mereersino garinni loonsanni hee’noonni.
Qoqqowoho fayyimmate uurrinshuwa halashshate loossanni xaa yannara 135 fayyimmate mereershuwa; umi deerri, xaphoomanna Riferaale xaphoomunni 21 Hospitaalla afantannota xawisinohu kalaa Yohaannisi; kuri Hospitaallara dagoomu isilanchimma nooha fayyimmate owaante afi’ranno gede fayyimmate pirogiraammanna haaroonshi loossanni irkinse gumullanni hee’noonnita egensiisino.
Konninni, qoqqowoho fayyimmate diwo xibbuunni 74% iillitinotano qummeessino. Qoqqowu deerrinni fayyimmate owaante massagate amanyooti raganni leeltanno qarrubba bande tiratenni dagoomu hasiissanno owaantubba garunni afidhannonna fayyimmate ogeeyyeno shooshanqetenni owaattanno gede assinanni hee’noonnitano qummeessino.
Deerru deerrunkunni afantanno fayyimmate uurrinshuwarano xaphooma fayyimmate owaante amanyoote massagate hayyo xa’mamooshshu noohanna annimmatenni massaga dandiinanni garinni loonsanni hee’noonnitano hattonni.
Fayyimmate owaante uynanni hayyubba woyyeessateno baxxinohunni Hospitaallate hadhe xagisidhannorira, goxxe xagisidhannorira, ilate owaante hattono amuwunna qaaqquullu fayyimma owaante ragaanni islanchimma mereersino garinni owaantanni gede Biiro jawa illacha tugge loossanni afantannotano egensiisino.
Baxxinohunni, xaggatenna xaginaatu owaantera hasiisanno uduunni shiqo kalqeteno ikko gobbate gede anje nooha ikkasinni qoqqowu mootimma haja la’annonsa bissanni ledo halamatenni dandaami bikkinni fayyimmate uurrinshuwara shiqishate wo’naallanni hee’noonni yiino. Xaggatenna xaginaatu owaantera hosanna uduunni anje tirateno Qoqqowu mootimma diru dirunkunni 30—40 miliyoone ale Birra gaamatenni shiqo woyyeesssate loossanni afantannotano xawinsoonni.
Amuwunna qaaqquullu fayyimma woyyeessateno fayyimmate uurrinshubbara hasiisannore wonshatenninna kalqoomu fayyimmate uurrinsha wortino wodhonna fayyimmate uurrinshuwa waaxo garinni loonsanni amuwunna marqu qaaqquulli reyo ajishate illachinshe loonsanni hee’noonnitano kalaa Yohaannisi lede xawisino.
Amsaalu Felleqe
Bakkalcho Maaja 20 , 2015 M.D
