-Kofatto hanaffunkunni kayse 18.35 biliyoone birri ale gamba assinoonni
Addis Ababa:- Gattinota Abbay kofatto ijaarshi loossa gumulate assinanni irko kaajjite suffanno gede Bayriidi haaroo`mate kofatto yannate geeshshi qineesso pirojekite borro mini woshshatto shiqishi.
Kofatto hanaffunkunni kayse Ella 30/2015M.D geeshsha 18 biliyoone 350 miliyoone 866 kume birri ale dagoomuwiinni gamba assinoonnita xawinsoonni. Pirojekitete borro mini Laynki Qara Dayreekitere Dukko Fiqirte Taammir Itophiyu pireesete uurrinshara coyidhino garinni; gattino Abbay kofatto ijaarshi loossa jeefisate dagoomu beeqqo kaajjite sufa noose.
Yuniversitubba, tuqu xaadooshshuwa, dipiloomaatootunna fullahaano kofattote assinanni irko kaajjite suffanno gede kaa`litanno huwanyoote cu`mishiishshannonna kakkaooshshu loossa hala`ladunni gumula hasiissannota qummeessitino.
Dukko Fikirte ledoteno; woraddate afantanno gashshootta, hallanyunna mootimmate uurrinshuwa hattono amma`note annuwi kofatto gooffanno woyte afisiissanno horo egensiisate ragaanni hanaffinoha danchummate looso aanteteno kaajjisha hasiissanno.
Dipiloomaatootuno heedhannowa kalqete qooxeessira Diyaasporu dagooma kakkaysatenni mittimmanke malaate ikkino kofattote ijaarshi irko kaajjitanno gede loosa hasiissannotano sokka sayissino.
2015M.D gobbate woyyino keeri heerirono sae sae babbaxxitino bayichubbara ka`anno gaancuwanna tuqu xaadihu huwanyoote kalaqate loosi qiidawara irko gamba assinanni harinsho aana mitiimma ikke keeshshinotano egensiissino.
Abbebech Maatewoos
Bakkalcho Maaja 20 , 2015 M.D
