Addis Ababa:- 3.6 miliyoone doolaare fulonni gobbate deerrinni HIV (AIDS) taraawo deerri noowa egensiissanno xiinxallo gumullanni hee`noonnita Fayyimmate Minisitere egensiissu.
Fayyimmate ministerera HIV AIDS gargadhanna qorqorshi massago loosu gumulsiisaano duuchu handaari dawaro deeske sooreessi Kalaa Habtaamu Kaasa Itophiyu pireesete uurrinshara xawisino garinni; HIV taraawo deerri xiinxallo luphiima ogeeyyenni irkisante gumulantanni afantanno.
Kalaa Habtaamu xawishshi garinni; ontu ontu diri giddo gumulama nooseti HIV taraawo xiinxallo gumulantunkunni lamala diro ikkinose. Gobbate deerri assinanni xiinxallo yannatenni gumulama hoogase taraawote deerri garunni egennamannokki gedenna halamaano bissa hasiissanno irko assitannokki gede xiiwo gashshino.
Xiinxallo luphiima baajeette xa`mitannota ikkase ledo amadisiisame; gobbate aana wirro wirro higge kalaqantanni noo gaancenna amadisiisantino hajubba mitteenni ledante xiinxallo amandoonnise yannanni gumulantannokki gede guficho ikkite keeshshitinota coyi`rino. Hananfoonni xiinxallo 2016M.D gooffannota egensiise; vayrete taraawo deerri noowa gobboomu taje mitteenni amaddino xiinxallo ikkitinota huwachishino.
Kalqete Fayyimmate Uurrinsha mashalaqqe garinni vayresete taraawo bikka 100 iillanno woyte taraawo ikkate deerrira iillino gede adhinanni yiinohu sooreessu; Itophiyu daganna fayyimmate xiinxallo uurrinsha A.K 2016 assitino xiinxallonni Itophiyaho HIV vayrese taraawo deerri 0.9 ikkasinni, taraawo ikkate deerra diillino yiino.
Itophiyaho 610 kumi qansooti vayresete ledo heedhannota konni albaanni buunxoonnitano xawisino. Vayresete korkaanni dirunni 11 kumi qansooti HIVni lubbantannotanna 8 kumi 300 qansooti haaru garinni vayresetenni amadantannota kiirote mashalaqqubba leellishshannota coyi`rino.
Kalaa Habtaamu egensiisino garinni; babbaxxitino yannara gumulantino illaallishshu xiinxallubbanni dirinsa 15-24 giddo afamanno wedelli HIV (AIDS) taraawora luphiimunni reqeccaabbinoreeti. Gobbate gede vayresete reqecco luphi yitannonsa yine hendoonnire 265 woradda bande qorqorshunna hattono huwanyoote cu`mishiishate loossa hala`ladunni gumullanni hee`noonnita xawisino.
Abbebech Maatewoos
Bakkalcho Maaja 20 , 2015 M.D
