Addis Ababa:- Babbaxxitino wolqate buichonni Itophiyu caabbichu wolqa burqisate dhukise daanno lewu diri giddo 17 Giiga Bayte iillishate loonsanni hee`noonnita Wayinna Wolqate Ministere egensiissu.
Wayinna Wolqate Ministere Ministirchi Dr. Injiiner Habtaamu Ittefa Itophiyu Pireesete Uurrinshara xawisino garinni; suffe aantanno lee dirra giddo miinju hasatto wonshate dandisiissanno wolqa wayinni, diilallotenni, arrishotenninna baattote giddo foolinni burqisate mixo amandoonni.
Tenne yannara gobbate deerrinni caabbuchu wolqa burqisate dhuki 5 Giiga Bayte ale iillino yiinohu Ministirchu; tini kiiro Abbayi kofatto wo`munni wo`ma gooffanno yannara ero ikkitanno; xaano Koyishunna wolootta wolqate buicho lendiro daanno lewu diri giddo Itophiyu caabbichu wolqa burqisate dhuki 17 Giiga Bayte iillannota egensiisino.
Qansootu caabbichu wolqa horoonsi`rate hasattonsa jawa gede lexxitanni noota Ministirchu qummeesse; tenne wolqate hasatto wonshate uurrinsha addi addi haaroonsate wolqanni caabbicho burqinse wonshate Ministere loosu mini babbaxxitino haaroonsate wolqa buichonni haaro wolqa burqisanno mereersha ijaarsiisanni gobbate sokkosi fulanni noota coyi’rino.
Albillichono, gobba lossate amaddino mixo seekkinota ikkitanno gede irkissannota isilanchonna huluullo nookki wolqate shiqqo tuqisate illachiinshe loonsanni hee`noonni yee; babbaxitino wolqate buichonni burqinsoonni caabbichu wolqa 4 Giiga Baytera noowinni 2015M.D 540 Meega Waatte burqisatenni gobbannita wolqa burqisate dhuka onte Giiga Bayte widira lossa dandiinannita coyi’rino.
Ministirchu xawishshi garinni, xaphoomunni laashshinoonni caabbichu wolqa 2015 baajettete diro 18 kumenna 995 Giig Waatte saate loosate mixo amande 18 kume 934 Giiga Waatte saate loosa dandiinoonni.
Konninni, diru giddo caabbichu murmuramate keeshsho yannasi 16 saatenni 10 saate widira ajisha dandiinoonni yiinohu Ministirchu; caabbichunnihu xintu latishsha halashshatenni gobbanniha caabbichu iilladimmanna qansootu horaamimma buuxisate caabbicho beenkanniha diriirsatenni 120 kumi km noowinni 128 kumi km widira lossa dandiinoonni yiino.
Abrahaam Saamueel
Bakkalcho Maaja 20 , 2015 M.D
