Addis Ababa:- 16 loosu minna loosaasine looso murte fultuhu gedensaanni 362 kume 662 birra aganu baatooshshe baatansa Federaalete Qara Oodiitere egensiissu. Gamba assitanno eo garunni egensiissannokki uurrinshuwa nootano xawinsoonni.
Federaalete Qara Oodiitere Dukko Meseret Daamxe Itophiyu pireesete uurrinshara coyidhino garinni; gumulamino baatooshshi loosaasine looso agurtu gedensaanni loosu kifilla womaashshu kifillara loosaasine noota egensiisa hoogansanni baantoonniho.
Wole widoonnino, aganu baatooshshe balanxe baantoonniha ikkasinni doogimale ikkino garinni mootimmate kaazininni 362 kumi 662 birre fulo assinoonni.“Mite mite uurrinshuwa aana harinsoonni shallagote qorqorshinni baajeettete ali woxe horonsi’ra noota buuxa dandiinoonni” yitinoti Qara Odiitere; kunino batinyunni leellinohu Yuniverisitubbate ikkinota huwachishshino. Kunino, Yuniverisitubba gamba assitanno eo garunni egensiissannokkita leellishannoha ikkasi buuxissino. Kuni qarri kiirotenni 35 ikkitanno Yuniverisitubbara kalaqaminota coyidhino.
Qara Odiitere kultinori mereerinni Wolayitta Sooddo Yuniverisite 338.6 miliyoone birra; Waachamo Yuniverisite 266.7 miliyoone birra; Miizaan Teepi, Dillunna Arbaamincete Yuniverisitubbano lawino garinni buesi afantinokki woxe horonsidhino uurrinshuwa mereerinni qarunni kullannireeti.
Qara Odiitere xawishshi garinni; eote loosi amanyootinni hiitti uurrinshano eose egensiisse fulo horonsidhannoha ikkiro uurrinshu eo egensiisatenni anfoonnikki eo horonsidhino diyinanni. Kuni woxi buesi afantinokki eo yaannohunni amadaminohu eonsa garunni egensiisa hoogansanninna baajeettete ale horonsi’ransa harunseeti.
Mito mito woyte amandoonni woxi ale horonsi’ra baajeette milli assine horonsi’rate ledo amadisiisaminoha ikkara dandaannota xawisse; ikkollana, baajeette milli assine horonsi’rate mittu gari loosi kifile giddo ikkiro uurrinshu sooreessira; mittu loosu handaarinni wole loosu handaarira ikkiro qole Woxu Ministerera fajjishiishira hasiissannota huwachishshino.
Hala`lado xe`ne leeltinonsa uurrinshuwa sooreeyye xa`mamaano assate ragaanni shiqqinose xa`mora uyitino dawaronni; Qara Odiitere yawo dagate riqiwamaano amaale minira ripoorte assa calla ikkinota coyidhino. Konni kaiminnino xa`mamooshshe buuxisiisate biilloonye uyinoonnisihunna ripoorte shiqqannosi bisi agarantannosi yawo fuliro xa`mamooshshe buuxisiisa dandiinanni yite ammantannota xawissino.
Abbebech Maatewoos
Bakkalcho Maaja 20 , 2015 M.D
