Addis Ababa:- Tigirayete kaansoommohu haanju harumi chiginye calla ikkikkinni baxillenna mittimmano ledooti yiino IFDR Dagate Riqiwamaano Amaale Mini Songaafichi kalaa Taaggese Caafo.
Tigirayete qoqqowira soojjaati zoone Tsirio Wembertu woradira Mikaeel Amba yinanni olliira Federaaletenna Qoqqowu yannate geeshshi gashshooti massagaano haanju harumi chigginye kaasate looso qooxeessu daga ledo harissino.
Chigginyete kaashshi loosi aana afaminohu Dagate riqiwamaano amaale mini songaafichi kalaa Taaggese Caafo xawisanni; haanju harumi mixonni kaansoommohu chigginye calla ikkikkinni mittimmanna mimmito irkisano ledooti yiino.
Keeru sumimme gedensaanni laynki yannara Tigirayete qoqqowo maransa kayisinohu Songaafichu; keeru sumimme kaajjishate keerenna baxille bowirsate dangoommo yaanni coyi’rino. Keere halashshate widoonni luphiima sharro assinoommo; konninnino jawa soorro daggino. Wo’manti Tigirayete daga dayno guma wodanchitanno yiino.
Keerenke, baxillenkenna mittimmanke kaajjishate noo qarra hasaawunni tira hasiissanno yiinohu kalaa Taaggese; hasaawunni tidhamannokki coyi dino. Konnirano budu, rosichunna seeru noonke yaanni xawisino.
Afi’noonni guma latishshunni irkisatenni kaajjisha hasiissanno yee; Tigirayete daga kalaqamu jiro agarooshshinni haammata loossa gumultinota, rosicho beekkino daga ikkasenni aantete mittimmatenni loonseemmo yaanni coyi’rino. Tigirayete qoqqowi yannate geeshshi gashshooti pirezidaantichi kalaa Geetaachew Redda isi widoonni; qoqqowoho afi’noonni keere konni aleenni buuxisate latishshano kaajjinshe loonseemmo yiino.
Keerenna latishsha kaajjishate assinanni sharrora Federaalete mootimma ledo halamme loosanke sunfeemmo yiinohu kalaa Geetaachew; qoqqowu daga latishshunni konni aleenni beeqqaano ikkitanno gede woshshatto assino.
Qoqqowoho loosantinokkiri haammata pirojektuwa noo daafira daga wolqansa fajjitu garinni latishshu loosi gumulora sharrama hasiissannonsa. Konnira Federaaletenna woloottu bissanni assinanninke irko qinaambe loosa hasiissannonke yiino. Qoqqowu daga kalaqamu jiro agarooshshinni lawishshu gede kayinsanni dagaati. Daga galagalte latishshu loossa aana beeqqaano ikkansa hagiirsiissannote yaanniiti lede qaagiissinohu.
Gibrinnu ministere Dieeti Pirofeeser Iyyaasu Eeliyaasihu isi widoonni; qoqqowu olu korkaatinni sa’u dirrara haanju harumi mixonni beeqqaancho ikka hoogirono xa kayinni latishshu widira higansa jawaachinshannite yiino. Dubbu haqqe kaasanke mittimmatenna baxillu xawishshaati yiinohu Pirofeesere Iyyaasu; Ministere Tigirayete daga latishshunni kaa’late murci’raanchote yiino.
Pirofeeserchu xawishshi garinni; babbaxxitino qoxeessubbara afantannori xawonna mulla ikkitino base chigginyetenni diwama noose. Konnirano, mitteenni jawaata looso loosate ka’’a noonke yiino. Tigirayete qoqqowira xaa yannara babbaxxitino qooxeessubbara haanju harumi mixo gumullanni hee’noonnita xawisino.
Qiddist Gezaheny
Bakkalcho Maaja 13, 2015 M.D
