2015 M.D gobbate deerrinni haanju harumi pirogiramenni 6 biliyoone chiginye kaasate mixo amande loonsanni hee`noonni. Saiha Maaja 10 soodonni hawarro leeshshote geeshsha 500 miliyoone chiginye kaasate mixo Dr Abiyi sayisino sokkanni mixote aleenni ikkitino chiginye kaansoonni.
Sidaamu Dagoomi Qoqqowi Mootimmano mitte soodonni 25 miliyoone chiginye kaasate amaddino mixo kaima assite gumultinota buuxissino. Tenne pirogiraamera gobbatenna qoqqowu deerrinni haammata daga guurate fulte beeqqaano ikkatenni uminsaha haruma worte sa`ino.
Haanju Harumi Pirogiraame aana beeqqaano ikkitino daga giddo Hawaasi Quchumi teessaano hedonsa Bakkalcho gaazeexira uyitino. Beeqqaanono “Gobbate deerrinni haanju harumi pirogiraamenni kaansoonni chiginye agarre awuunte lossate qeechi noonke” yitino.
Hawaasi Quchumi Gashshooti giddo Milenemetee Ollii teessaanchi Weellichu Idiget Kifiluhu xawisanni, gobbate deerrinni hananfoonniha haanju harumi pirograame aana beeqqaancho ikke umisi haruma worino daafira hagiiraammo ikkinota xawisino. Wedellichu, “kaansoonni chiginye muqaaqqe jajjabba haqqe ikkita geeshsha agare towaate lossate qeechi nooe yiino.
Wolu chiginyete kaashshi aana beeqqaancho ikkinohu Kalaa Tekkallinyi Tumaatoho, haanju harumi pirogiraame polotiku hajo ikkitukkinni gobbate hajo ikkitino daafira mittu mittunku qansichi dilaalasi fula noosi yee xawisino.
Tekkallinyi yaatto garinni, chiginye kaasa mitte timo ikkitara dandiitanno;kaayinnilla agaranna towaata hoongiro gafa gantannokki daafira kaansoonni haqqi mu`re lopha geeshsha mitti mittinke qeechi luphiimaho.
Kalaa Tekkalinyi umisiha haanja haruma worinohu Kolishshu wayi qooxxeesira ikkinota xawise, kaansoonni chiginye wolu shuqune lossara agura calla ikkikkinni noosi dhuka horoonsi`re lophite haqqa ikkita geeshsha awuute lossannota kulino.
IFDR Xaphoomu Ministerichi Dr Abiy Ahimedihu, tayxeha haanju harumi pirogiraame, “Ga`ara techo kaanso” yaanno massagote qaalinni millimmo hanafisiise, saiha Maaja 10 mitto barra 567 miliyoone ali chiginye kaanse mixote aleenni gumulloonniti qaangannite.
Abrahaam Saamueel nna Addisu Adoola
Bakkalcho Maaja 13, 2015 M.D
