Hawaasa:– Qoqqowunniha diru laalchonna laalchimma lossate gorsunna laayyote latishshi loossa aana illachunni loosatenni dagooma horaameeyye assa dandiinoonnita Sidaamu qoqqowi pirezidaantichi Desta Ledamo egensiisi.
Pirezidaantichu tenne yiinohu Qoqqowu amaale mini 6ki doorshi 3ki loosu diri 5ki uurrinshu songo harinsi yannaraati. Pirezidaantichu xawishshi garinni; baxxinohunni tayxe badheessu yannanni sagaletenni meessaneete dandaatenna dikko ga`labbisate assinoonni kaajjado wo`naalshinni guma maareekkinoonni.
Guma maareekkinanni gede assitino loossa mereerinni mitte baattono qatume galtannokki gede baatto loosidhe galtino laashshaano sumuu assatenni loosu giddora eannonna laalchimma lossitanno tekinoloojubba shiqisha dandaatenni ikkinota buuxisino.
Pirezidaantichu amaalete mini songo aana qoqqowu mootimma 2015 baajeettete diri loosu gumulshi ripoorte shiqishi yannara huwachishino garinni; qoqqowoho sai baajeettete dirinni heeshshote oolto ga`labbisatenna dagoomunnita latishshu horaameessimma buuxisate kaa`litanno loossa gumulantino.
Maatete Jireenya loossa gumulatenni maatete Jireenya buuxisiisate addi illachinni loonsoonnitano xawisino. Qoqqowoho leeltannota baattote ruukkimma hedote giddo woratenni yannaasincho saadate jiro latishsha halashshatenni woyyaawino sirchi noonsa saada baatto loosidhenna ce`e galtinorira hattono meentohonna wedellaho tuqisatenni adote laalcho yannoonsa dandiinoonnitano Pirezidaantichu huwachishino.
Lukkuwu latishshi baattote ruukkora dancha hayyooti yiinohu pirezidaantichu kalaa Desta; konni ragaanni sai baajeettete diri giddo 4 miliyoone quuphe qaltanno lukkuwa tuqisate mixi`noonni bikkinni gumulloonnita kaajjillunni kaysino.
Konninni, luphiima ikkino quuphu laalchi baadiyyetenni quchuma taalashsho waaginni fula hanafino yanna aana afammeemmo yiino. Ledoteno, qoqqowoho noota loosu hoonge qarra tirate gumulloonni loosinnino haammatu qansootira uurrinshunna yannate geeshshi loosu kaayyo kalaqatenni liqoote owaante injeessinoonnita qummeessino.
Fayyimmatenni, rosunni, xalalu anganni way shiqishonninna wolootu handaarranni gumulantino loossa jawaachishshannore ikkansano pirezidaantichu xawisino. Fayyimmate handaarinni owaantete aamamishshinna xagichu shiqisho aana dagate koffeenyi noota qummeessinohu pirezidaantichu; baalunku fayyimmate uurrinshubbaranna Hospitaallate xagga garunni shiqqanno gede assinoonnitano coyi`rino.
Qoqqowoho danchu gashshootinna doogote ijaarshubba gumulo aana xe’ne noota xawise; doogote ijaarshi woffi yinohu diilallote gadi soorro luphiima xiiwo gashshasenniiti. Aananno baajeettete dirinni kaajjado midaado kaajjishatenninna laafa midaado badatenni loosate raga worranni yiino. Jeefoteno, Pirezidaantichu mootimmatenninna dagate millimmonni hanafantino latishshu loossa haaro baajeettete dirinnino kaajjite suffanno yiino.
Abbebech Maatewoos
Bakkalcho Maaja 13, 2015 M.D
