Addis Ababa:– Hawaasi Quchumi Gashshooti deerrinni tayxe 2015M.D mixonnni 3 miliyoone chigginye kaasate mixi`ne xaa geeshsha xibbuunni 70% gumulloonnita xawinsi.
Hawaasi Quchumi gashshooti Giwirinnu Biddishshi Sooreessi Kalaa Abebaayyo Laalimihu Bakkalcho Gaazeexira xawisino garinni; Quchumaho tayxe 2015M.D haanju harumi pirogiraame qinaabbinota assatenna quchuma haanja uddisiisate baalunku sinu quchumma massagaanonna daga noowa kakkaooshshu hasaawa assine loosu giddora e`noonni.
Quchumu gashshooti tayxe diro 3 miliyoone chigginye kaasate mixo amade chigginye qixxeessatenni xibbuunni 70% sai Maaja 10/2015M.D albaanni gumulloonnita Kalaa Abebaayyo xawisino.
Sooreessu xawishshi garinni; gobbate deerrinni mittu barrinni 500 miliyoone chigginye kaasate worroonni faasho kaiminni qoqqowu deerrinni 25 miliyoone chigginye kaasate mixo giddo Hawaasi quchumino 8 sinu quchummara 400 kume chigginye kaasate mixi`re, 389 kume chigginye kaasa dandiinoonni. Konninni, xibbuunni 96.8% gumulloonnitano egensiisino.
Konni kaansoonni chigginye giddo haammata kaasantinohu Tuulate Sinu quchumira 12 baaddiyyete olluubbara ikkinota xawise; baadiyyete olluubbara calla 194 kume ale ikkitanno chigginye kaasa dandiinoonni; gattinota quchumu giddo noo fano baychonna rosu minnara kaansoonnita coyi`rino.
Kaansoonni chigginye giddonni gama dubbu diwora ikkitannotanna, haammata kayinni sagaletenna duuchu dani horora hossanno gummatenna wolootta chigginye karsine kaansoonnita buuxisino.
Chigginye kaasa calla haqqete widira soorritannokkita coyi`rinohu Biddishshu Sooreessi; konnira mootimma illacha tugge daganna maamarrate tantanantino bissanni kaasatenni awuute lossate geeshsha qeechansa fultannore gaamme jawa looso loonsanni hee`noonni. Konnira baalisi kaasantino chigginye agare towaate qeechasi fulanni noota qummeessino.
Hawaasi Quchumi gashshooti giddo seerimalete haqqa doltannori nookkiha ikkirono; saadanna sae sae mannu giddoonni doogo assi`re ha`ranni nooha ikkanna; konne duuchanka woyte harunsatenna qorqorate looso loonsanni hee`noonnita qummeessino.
Dagano kaansoonni chigginye uminsa gede assite awuutte lossituro qarqarinsa biifanno; hakkiini sae yannasi agadhino xeena afidhanno; shotu garinni diilallote gadi soorro xiiwo gargadha dandiitanno daafira, haqqe kaasa calla ikkikkinni agarenna towaante lossa hasiissannota qaagiissino.
Abrahaam Saamueel
Bakkalcho Maaja 13, 2015 M.D
