Addis Ababa:- Chigginye kaasate leellinshummo kakkaooshshi hakko bikkinni agarooshshe assate aanano sufa hasiissannota Wondo Gennetete Dubbunna Kalaqamu Jiro Kolleeje Diine Dr. Saamueel Beqqelehu huwachishino. Kolleeje shoolki doyicho haanju harumi mixonni 1 Miliyoone ali chigginye kaassinotano xawisino.
Itophiyu Pireesete Uurrinsha ledo bilbilunni hasaawa assinohu Kolleejete Diine Dr. Saamueel Beqqele; chigginye kaasate assinummo sharro hakko bikkinni kaasantinotera amadooshshenna agarooshshe assatenni kaajjinshe sufa hasiissannota huwachishino. Baxxinohunni, baadiyyete qooxeessira saada kaddannokki gedenna mooltannokki gede harunsatenni agarooshshe assa hasiissanno yiino.
Wondo Gennetete Dubbunna Kalaqamu Jiro Kolleeje, Xaphoomu ministirchi Dr Abiy Ahimedihu hedo kaiminni gobboomu haanju harumi mixo hananfikkinni balaxxe techo 45 diri albaanni hanaffe babbaxxino haqqu sircho kaasatenni seeda dirra rosicho afidhinota ikkase qummeesse; dubbu latishshi loosi Kolleejjete qarunni illacha tunganni hajo ikkase xawisino.
Kolleejje haanju harumi looso hananfihu gedensaannino chigginyuwa qixxeessite qooxeessu dagara shiqishatenni luphiima qeecha fultanni afantanno yiinohu Dr. Saamueeli; konninnino xaa yannara dubbu iillo hala’litanni dagginoha ikkanna; dubbu hala’lanni moltinoti wayi bu’ano wirro burqitanni afantannota egensiisino.
Konni gobbaanni Kolleejjete rosaanono uurrinshu rosinsara qoteho dubbu amadooshshi aana luphiima dandoo amadde fultanno gede chigginye qixxeessatenni hanaffe dubbu amadooshshi aana agenno afidhe mootimma hanaffino looso ogimmatenni kaa’litanno gede sharro assinanni hee’noonni yiino.
Haanju harumi diilallote gade soorronna fayyimmate ragaanni jawa kalqete illacha ikkasinni ledote laalchimma lossatenni sagalete wowe buuxisiisatenna bushshu shamme agarate widoonnino luphiima qeecha afi’rinota ammannanni yaatenni ogimmate xawishsha uyinohu Dokter Saamueeli; baalunku ragi ragisinni kaasantino chigginyuwara agarooshshe assanna haanju harumi mixo guma gansiisatenni qansichimmate qeecha fula hasiissannota duu’re huwachishino.
Qiddist Gezaheny
Bakkalcho Maaja 13, 2015 M.D
