Addis Ababa:– Sidaamu dagoomu qoqqowi Pirezidaantichi kalaa Desta Ledamo Cheeki Ripebilikete Ambaasaaddere Miirosilaavi Kosaaki bero barrinni borrosi mine haare hasaawisino.
Pirezidaantichu kalaa Desta Ledamonna Ambaasaadderichu assitino hasaawinni; Cheeki Ripebilikete mootimma Sidaamu qoqqowira xalalu anganni way uurrinshuwa ijaarshinni, qoxeessu co’ichimmanna fayyimmate agarooshshi handaarranni assitanni noo irko kaajjite suffannota torbitino.
Wole ragaannino, kalaqamu jiro agarooshshinni, gawajjantino baatto wirro lattanno gede yannitte giwirinnu tekinoloojenna hayyo egensiisate loosino albillicho kaajje sufa hasiissannota pirezidaantichu coyi’rino.
Ambaasaadderichu Miirosilaavi Kosaaki isi widoonni; mootimmansa qoqqowoho sase woraddaranna mittu quchumu gashshootira xalala anganni way uurrinsha ijaarsiissanni noota xawise; 23 olluubbara qooxeessu co’ichimmanna fayyimmate agarooshshi loossa irkinsanni ijaarshuwa harissanni noota coyi’rino.
Kalaqamu jiro agarooshshinna gawajjantinonna laalcho uytannokki baatto wirro lattanno gede assate loossano Lokka Abbaayyunna Cuukkote woraddara loonsonnita coyi’re; yannitte giwirinnu tekinolooje egensiisate loossano hattonni loonsoonni yiino; Ambaasaadderichu.
Gaazeeexu Odeessaanchinni
Bakkalcho Maaja 13, 2015 M.D
