Addis Ababa: – Haanju harumi loosi wolootu latishshu loossara baalaho xintaho yaanni Gorsunna Gammoojjitte Qarqari Ministeere Deetichi Dr Indiriyaasi Geetuhu coyi`ri.
Gorsunna Gammoojjete qooxeessi ministere massagaanonna loosaasine Addis Ababaho Qirqoosi Sinu quchumira Worada saseho Gootaraho leelte mittu barri haanju harumi chigginye kaassino.
Pirogiraamete aana afaminohu Gorsunna Gammoojjitte Qarqari Ministeere Deetichi Dr Indiriyaasi Geetu coyi’rino garinni; haanju harumi wolootu latishshu pirogiraamera baalaho xintaho. Itophiyunni sae gattino kalqera aanno qeechi jawa latishshu pirogiraameeti.
Mitte soodonni 500 miliyoone chigginye kaasate amandoonni mixonni kaima assine baalunku Ministerete loosaasinenna massagaano soodo guurate fulte xeenu hoolinsakkinni chigginye kaassanni hossinota Dr Indiriyaasi xawisino.
Minister Deetichu lede, haanju harumi pirogiraame diilallote gade soorro xiiwo iillishshanni noo qarra dandaate, bushshu hoshooshamme ajishate, bu`a burqitanni lexxitanno gede assa qoleno bushshu shaqqille ledatenni laalchonna laalchimma lossate qeechisi luphiimaho yiino.
Dr Indiriyaasi xawishshi garinni, Ministeerete loosasine Qirqoosi Sinu quchumi ledo halante babbaxxitino horo afidhino chigginye kaassinoha ikkanna; chigginye towaatate loosi kaajje sufanno; Kunino, Addis Ababaho diilallote gade soorro biddi assatenni hee`rate injiino qarqara kalaqannota coyi’rino.
Gorsunna Gammoojjete Qarqari Ministeere loosasincho ikkitinoti Dukko Ayyelechi Bayyaniti, haanju harumi qaraqru fayyimmara qara loosooti; konnira baalunku dagoomi fule kaysino chigginye awuute lossate qeechi noonsa yitino.
Baalunku qansootira babbaxxitinoti amma`nonna polotiku laooshshi noosiha ikkirono; kuni loosi kayinni gobbatenni sae kalqete hajo ikkino daafira, amandoonni mixo gumulo afidhanno gede assate qansootu dilaalansa fula hasiissannonsa yiinohu wolu ministerete loosaasinchi kalaa Ali Huseeniho.
Qirqoosi Sinu quchumira Worada sasu Jireenyu Paarte Sinu Borro mini sooreessi Kalaa Dilaali Hulaali isi widoonni; woradaho haanju harumi pirogiraamera woradu teessaano Gorsunna Gammoojjete Qarqari Ministeere ledo halamatenni haanja harumansa wortinota xawisino.
Abrahaam Saamueel
Bakkalcho Maaja 13, 2015 M.D
