Hawaasa:– Sidaamu dagoomu qoqqowi amaale mini 6ki doycho 3ki loosu diri 5ki uurrinshu songora, 2016 M.D mixo gumulsiinsanni baajeette 22 biliyoone 637 miliyoone 792 kume 144 birra assatenni wo`ma huuronni kaajjishino. Baajeette IFDR mootimmanni, mootimmannita ikkitinokki uurrinshubbanni, qoqqowu mootimmanninna giddo eonni wonshinannita ikkaseno xawinsoonni.
Baajeette qoqqowu mereershinni kayse, zoonnate hattono baalante woraddaranna quchumu gashshoottara gaammoonniha ikkanna; qoqqowu mereershira 6 biliyoone 854 miliyoone 602 kume 737 birra, woraddatenna quchumu gashshootira 10 biliyoone 371 miliyoone 618 kume 448 birra;
Hawaasi quchumira 4 biliyoone 397 miliyoone 229 kume 359 birra; hornyaame latishshu timo gumulsiisate (SDG) 574 miliyoone 341 kume 600 birra, zoonnate gashshoote uurrisate 240 miliyoone, qoqqowoho agarooshshu baajeette 200 miliyoone; xaphooma 22 biliyoone 637 miliyoone 792 kume 144 birraati amaalete mini kaajjishinohu.
Baajeettete hedo qoqqowoho gamba assinannita eote bue halashshanna woyyeessa hattono qoqqowoho dagate latishshu hasatto hedote giddo worinoha ikkase buuxinsoonni. 2016M.D qoqqowoho amandoonnita baajeette garunni horonsiratenni dagoomu horaameessimma buuxisiisa hasiissannotano qummeessinoonni.
Amaalete mini 6ki doyicho 3ki loosu diri 5ki uurrinshu songo Hawaasi quchumira Maaja 8-10/2015M.D geeshsha harinsoonniha ikkanna; barete aana 2015 M.D mixi`noonni loosu jeefishshi ripoorte hattono 2016 M.D loosu mixo, addi addi lallawubbanna ajandubba aana hasaawa assinoonni.
Barraho Afii fanote hasaawa assitinoti qoqqowu amaalete mini qara songaafitte Dukko Faantaye Kebbede coyidhanni; Sidaamu qoqqowu amaale mini sai baajeettete dirinni baincho assootubba sharramatenna dagate latishshu xa`mubbara garunni dawarate wo`naalloonnita egensiissino.
Songaafitte Dukko Faantaye xawishshi garinni; Sidaamu daga qoqqowo ikkite fultu kawa sajjoo dirra giddo gumulantinokki loossa sasu dirri giddo gumula dandiinoonni. Amaalete mini mixo mixi`re tantano qixxeessatenni babbaxxino handaarinni latishshu loossa gumulino.
Baajeettete dirinni xaphooma 22.6 biliyoone birra gamba assatenni babbaxxitino qoqqowu latishshu loossaranna uurrinshu fulora hosiinsannita amaalete minira shiqqino ripoorte aana buuxinsoonniha ikkanna; baajeettete qixxaawo gumaamimmara qoqqowu massagaano, teessaano, daddalu dagoominna loosaasine ha`lantanno gede xa`minoonni.
Abbebech Maatewoos
Bakkalcho Maaja 13, 2015 M.D
