Hawaasa:– Kalqete dagoomira yaaddo ikkite suffinota diilallote gadi soorro gargadhate Itophiyu mala ikkino looso gumultanni afantanno yaatenni qoqqowu pirezidaantichi kalaa Desta Ledamo xawisi.
“Ga’a techo kaanso” yaanno uminni mittu barrinni 500 miliyoone chigginyubba kaasate amandoonni mixo jeefisamase harunse hawalle tashshi yii`ne yitanno sokka saysinohu Sidaamu qoqqowi pirezidaantichi kalaa Desta Ledamo; halantino cigilenni gumulaminohu haqqu kaashshi mittimmankenna jireenyinke xinta ikkasi leellishannoho yiino.
Pirezidaantichu sokkasinni baalunku handaarinni halantino cigilenni assineemmo wo`naalsha kaajjishatenni gobbanketa jireenyu harinsho kaajjisha hasiissannota huwachishino.
Kalqete dagoomira yaaddo ikkite suffinota diilallote gadi soorro gargadhate Itophiyu mala ikkino looso gumultanni afantanno yiinohu pirezidaantichu; ninke Itophiyu daga tenne yaaddora halantino cigilenni kalqete dagoomira malate biso ikkanke leellinshoommo dhaggeeffantanni barraati yiino.
Techo mittimmatenninna halamatenni 500 miliyoone chigginye kaasate mixi`ne mittimmatenni ka“ankenni gumullammora dandiinoommo yiinohu kalaa Desta; tenne mittimmanke baalunku handaarinni kaajjishatenni Itophiyu jireenya ollohisa hasiissannotano xawisino.
Qoqqowu deerrinni mitte Arrishshonni leeshshote geeshsha 25 miiliiyone chigginye kaansoonni gede coyrinohu pirezidaantichu konnira dagoomu beeqqo naandannita ikkitinotanna haanju harumi hajo qoqqowu daga ledo kaajjadu xaadooshshi nooseta ikkitino gede qummeessino.
Kaansanni chigginyeno ikkito alba kaasantino chigginyubba seekkine amadatenni ilamate woyyaabbino haanja gobba tareessate baalunku qeechasi fulanno gedeno qaagiisse amandoonni mixo gumulate uminsa qeecha fultino bissano galatino.
Abbebech Maatewoos
Bakkalcho Maaja 13, 2015 M.D
