Hawaasa:- Sidaamu qoqqowira “Teknoloojete base” yine 31 kumi hektaare ali baatto aana buna qasiisotenni latinsanni hee’noonnita Qoqqowu Irshunna kalaqamu jiro latishshi biiro egensiissu. Biiro tayxe dirinni calla 2 kumenna 900 Hektaare ali baatto aana Abukaadote chigginye kaansoonnita xawissino.
Qoqqowu Irshunna Kalaqamu Jiro Latishshi Biiro Sooreessi kalaa Memmiru Mokehu Itophiyu Pirteesete Uurrinshara xawisino garinni; Biiro bunu laalchimma leddara dandiitanno tekinolooje aana loossanni afantanno. Baxxinohunni Buna “Tekinoloojete Base” yaatenni 30 Kume haktaare baatto ale bande qasiisotenni latinsanni hee’noonni.
30 kume Hektaare ali baatto latissanni noohu qoqqowoho afantanno 6 woraddaraati yiinohu Biirote Sooreessi; konni aana beeqqitannore loosidhe galtino daga bande babbaxxitino paakeeje mitteenni ikkitanno gede assate loonsanni hee’noonnita xawisino.
Sooreessu yaatto garinni; xaa yannara Bunu laalchimma lossate loonsanni hee’noonni. Ikkollana, laalchu widoonni lowo hasatto heedhurono shiimunni 31 Kumi toone geeshsha kalqete dikkora iillishatenna qixxeessate looso loonsanni hee’noonni.
Sidaamu Buni kalqete dikkora afamannohu kalaqamu amadosinniiti yiinohu kalaa Memmiru; sa’u batinye dirrara tenne nyammosinni isilanchimmate deerrinni qeelaancho ikka dandiinoonni. Konni daafira, konni aleenni lossate mittu dirinni calla 3 Miliyoone Toone aleenni komposte qixxeessatenni bunu kaashshira horote aana hosanno gede assinannita xawisino.
Tayxe dirinni 27 Miliyoone Bunu chigginye qixxeessine 26 Miliyoone ikkitannota kaansoonnita qummeesse; togo yaa bunu latishsha yannaasincho assate haaruudde bunu chigginyenni riqiwate looso ikkinota xawisino. Laalchimma lossate looso konni bikkinni loonsanni hee’noonnita coyi’re; handaaru konni bikkinni loosu kaayyo kalaqannohonna baxxinohunni gobbayidi woxu soorro abbannoho yiino.
Qiddist Gezaheny
Bakkalcho Maaja 13, 2015 M.D
