Addis Ababa:– Tayxe haanju haruminni 500 miliyoone chigginye mittu barri giddo kaasate pirogiraamera 566 miliyoone 971 kume 600 chigginye kaansoonnita Xaphoomu Ministirchi Dr Abiy Ahimed egensiisi.
Chigginyuwa xaphoomunni 302 kumi heekitaare baatto aana kaansonnitano xawisino. Kaansoonni chigginye kiiro jioispeeshaalete taje garinni buunxoonniha ikkanna; jioispeeshaalete giddora einokki qooxeessira kaansoonni chigginye nootanna kiironsano konni aleenni ikkitannota xawisino.
IFDR Xaphoomu Ministerichi Abiy Ahimed (Dr), mittimmatenni tenne seyoora ka`nummoro jawa looso loonseemmo; konni albaanni sayisino sokkanni Maaja 10/2015M.D Itophiyu mitto barra 500 miliyoone chigginye kaasate qixxaawe noota kule; Itophiyu daga baalanti halante loossanno gede woshshatto asse sainoti qaangannite.
Xaphoomu Ministirchi barraho sayisino sokkanni ledammummoro, mitto ikkinummoro, baalunku handaarinni Itophiyu daga mixi`noommoha gumulleemmota ammaneemmo. Maaja 10/2015M.D mitto barra soodihunni hashshi geeshsha arrishsho fulte e`ate mitte mittenti Itophiyu daga minensa digoxxanno. Hanqanfoonni qaaqqi, daafure noo geerchi, dhiwame goxe noo manni ka`a minesi ayino dihosanno.
Korkaatuno, tini polotiku hajo dikkitino; hettisamaano paarte pirogiraame dikkitino; Mootimmate hajono dikkitino. Tini Itophiyu hajooti. Uddisiinseemmohu Itophiyaho. Tirfu ninkewiinni sae kalqete gattannoho yaasi qaangannite.
Dr.Abiy Maaja 10/2015 MD hawarro uyino xawishshinni 566 miliyoone ali chiggine kaanse rikoorde hiiqqinoonnita xawisi gedensaanni jaafote taje buuxissino garinni barraho 567 miliyoone ale chigginyubba kaansoonni.
Abrahaam Saamueel
Bakkalcho Maaja 13, 2015 M.D
