Mittu illetenni la’’a dandaannokki geerchi ayee woyte doogote qaccera ofolle huucci’rannonka. Ayee woyteno huucci`ranno yannara mitte angasinni baxxitannosikki kaartoone aana borreessantino borro noonka. Kaartoonete aana “La’’a didandeemmo kaa`le’’e” yitanno. Doogote sa’’annohunna higanno mannni baalu tenne borro la“anni mulesiinni sa“anno. Mitu mitu noosire tuge sa’’anno gatihu qole agure sa’’anno.
Ikkollana, mitto barra soodontenni tini kalaqantu. Konni albaanni egenninokki manchi isiwa shiqqi yee daye borro amaddino kaartoone aana borreesse wirro worihu gedensaanni maano uyisikkinni agure ha`ri. Geerchu macciishshino huuronni huluullami. Manchu mulesi daye uurrita baca birre aasira woy qarrasi xa`mannosiha lawinosinka; ikkollana, maano yiikkinniiti aguresi ha`rinohu.
Shiima keeshsho gedensaanni isi akata soorranno coy kalaqami. Sa“aahu higaahu baalu noosire fushshe aa hanafi. Saantetenni sae bacu manni birre angasira aa hanafi. Geerchu huluullami, agari ku`u manchi maa asseeti ha`rinohu yee umosi xa`manninna huluullamanni hosi. Hatte saatera calla mannu kaa`linosihu agana wo`ma huucci`re afi`rinohunni roorannonka.
Tennenni maala`lanni hee`reenna barru taalo hurbaatu yannara mittu manchi isiwa shiqi. Isino huluullotenni “Wona ateeti borro borreessittohu? Maa yiteeti borreessoottohu beetto’ya?” yiisi. Manchuno hagiirrunni “Anna`ya ani sayikoloojiistete. Addaho woxunni dikaa`loommohe kayinni borro laummota borreessamino coy mannu kaa`lannohe gede dandiisiisannohekkita huwatoommohura borreessantino hedo sorroommo.
Umo “La’’a didandeemmo; kaa`le’’e” yitannonka; ani qole badheenni “Techo barru tashshi yaanno ani kayinni dilaeemmosi” yee suwisummo. Lai anna`ya! Mannu tenne nabbawanno woyte ate la“a hoonge ikkikkinni umisi caabbicho hedannohura noosire hagiirrunni atera kaa`lanno” yiisi. Geerchuno manchunnita anga amadihu gedensaanni galateeffatanni angasi sunqa hanafi.
Babbaxxitino basera babbaxxino garinni mannu ledo xaandanni tunceessuwa baasate. Doogonke aana qarramenna mitii`me hunquffi yee hosanno manna kaa`la dandiineemmo coy baalunni irkisa mannihimmate gadachooti. Wolootaho quuxanaambe assineemmo kaa`lo manchi beettira noonke baxillenna ayirrinye xawissannote. Wolootu qarri ane qarraati yine heda umosi dandiino suwashsho laooshsheeti. Saante aate gobbaannino manna kaa`lanna irkisa dandiinannita deammoonke.
Tenne borro borreessanna mittu coy qulli yiie; mite mite mooraano moorinsa takkora illetenni la’’a dandiitannokki huucci’raano doogote ofolte xeenunna arrishsho tintannansa itinokki godowinni afoo moolte huuccidhino saante uytaaha labbe heeshshi yite gamba ashidhe adhite ba`annonsa. Ille uyno Magani ho`lannotano diwodanchitanno. Insa duubburo wolu hude dimacciishshantannonsa; insa uddidho ikkinnina wolootu kallimma daafira diyaaddanno.
Techo ati afi’rakkinninna keeraanchimmakkinni Kaaliiqa galattanni atera woroonni noo mannoota qaagi xiibbootinsa; buxicho dureessa, keeraancho xiwamaancho yitanni manchi beetto babbaddooti. Bunshe assate hunattota yannakki danchummatenna manna kaa`late horonsi’rittoro mannuno Maganuno galatannoheta wodanchi.
Dancha barra ikko`ne!!
Abbebech Maatewoos
Bakkalcho Maaja 6, 2015 M.D
