Mittu manchi uwannohu qeelamanno woyte dikkino; uwannohu xaate ikkinoe yee uurrisanno woyteeti yaanno Richaard M.Nixon.
Heeshshokkinni mitto ammanoottonna gara ikkino illachi aana goofimarchu geeshsha cincate gobbaanni maano guma ikkino coye gumulattora didandaatto. Techo konnenna ko`onne hanaffanni qaccete geeshsha iillishitokkinni ga`a qole wolu coyera higate rosichi noohero dandaamihe bikkinni tenne harinsho soorra noohe. Batinye yanna mitto hananfoommo coye qaccete geeeshsha iillinsheemmokki gede qaru korkaati umbeemmo woyte woyi gumaa`minoommokkiha lawannonke woyteeti. Ikkirono uwa, gumaa`ma hooga, gifichunna labbino akatta mitte dancha ajuuja amade qaafanno manchi heeshsho giddo gattannokki harinshooti. Konni dafira umbetenni ka`nanni hayyo kaajjishira hasiissanno.
Umbiro ka“a doorshu nookki hajooti. Cincasinni egennamino manchi uwinno mitte mittente hedeweelchonni wirro hige ka“a borreessiise albillicho qaafanno manchooti. Sora, uwa, gumaa`ma hooga, hendoonniwa amandoonni yanna giddo iilla hooganna labbinori baca bareedda tuggino akatta isira lophote korkaattaati ikkinnina hexxo mudhate bue dikkitino. Tenne kalqe aana uwa heedhunte gede ka“annna wirro hige gumaa`mano noota ammanne qaafa hasiissanno.
Umbe mitte callicho hedeweelcho gede calla la“a digaraho. Ubbe gattanno mannooti ubbanno woyte ani uwaanchoho diseekkannoe, kaayyo dinoe yite heddanno mannootaati. Wole widoonni gumaa`mitino mannooti mitte umbe insa ayimma murtara difajjitanno. Umbe mitte callicho hedeweelchonna rosu kaayyo gede assiteeti kiirtannohu.
Wole harinshote hayyo soorrate. Gumaamu manchi coyebba mitte doogonni calla wo`naale diaguranno. Gumaa`mitinnokki doogo aguratenni akata wole doogonni shiqanno. Gumulate wodanisi giddo la“ino coyera mitte doogo seekka hoogguro wole doogo noota seekke ammananno.
Manchi beetti hiittenne harinsho giddono yawo adha noosi. Yaano gumaa`mitino mannooti loossino sorora yawo adhitannorenna woyyitino doogo hasate ka`annoreeti. Mittu wolootta kulatenni woyi eweli togo assie yee uurrisanna, wolu kayinni yawo adhatenni mala afi`ratenni kassi yaanno; albillichono sufo ha`ranno.
Umbetenni ka“ate wole qara doogo giddoyidinke aana illachishate. Qeelaano ikkitino mannooti gaangaawinsara gumulaminoha ikkikkinni giddoydonsa gumulamino coyi qara ikkinota seekkite affino. Insa gaangaawinsarano ikko insa aana ikkino coyi giddoyidonsa kisa hoogi geeshsha maano ikkitannokkita affino. Iillinonsahu hiikku ayirranno akatino giddonsa noota kaajjado ammana kisa hoogi geeshshanna garunni tumo qola dandiituro halchitinowa iillate diqarrantanno. Uwummorona yiteno horontanni diwaajjitanno. Qeellensano suffannota ikkitanno. Ikkinohurano baalunku giddoyidosi calla macciishshatenni albillicho gugguufa noosi yitannoti tenne lamala sokkankeeti.
Abbebech Maatewoos
Bakkalcho Ella 6, 2016 M.D
