Loosi’ri Manchira kaa’lanno Maganu!
Rooru Manchu noowe
Kaysannohu Boowe
Boowe kaysannoho kaajje seekke loose;
Weeshshu danqarame nafara wo’mino
Seekke loosi’rihu heeshshote ooltonni lubbo gagardhino.
Cee’ma duqulsite;buxisse shitanno
Mannuy maa’nissanno
Jawaata shollishshe
Worba woroo qolte
Foole qo’la hoolte
Yoranno assite
Albiido yarsite
Reeqqa miqqa qolte
Horo wotto worte
Dancha itikkinni
Woyyaabbino heeshsho,
horo laikkinni;
Abbalte shitanno.
Sidaaminke manna,
Egennino yanna;
Cee’ma huntannona
Jawaante loosi’no
Umonke dandiine woleho ikkino;
Shaqqado baattonke loosuy memelchino
Ayyidde goxa agurro loosoho jawaanto
Hanni buunxe la’no loosi’ranno mancho.
Jawaatu manchi’re shiima qummeesso’ne?
Assootisi gara xawise kulo’ne?
Qaddo qawaaxaamo
Loosi’ranno mancho
Isiti maatesi fultannolla halcho.
Goxicho agure
Loosinohu Gute
Shuqunnohu Gate
Hakkiinni Higiro
Minira Eiro
Hurbaatu Baete
Duuwo Durimmate;
Umisino Duuwe
Dikkono Duusheena
Maatesinni Sae
Wole Itiseenna;
Baaluri Wo’mino Intayri Angayri
Hunkiine Loonsiro May Nooxa Hoongayri?
Kapho Dudubbooti;
Loosidhe Boroodi;
Duduwunni Duma,
Loosinohu Guma
Duqqanno nadala
Biifanno nafara
Qae qananaawa
Eweli nafara
Yinanni marranni
Marre waariinanni
Hassaambe geenbanni
Loonsaayire hendanni.
Hanni roduuwa’ya yannanire qaango
Itaahu bati’no
Loosaahu ajino
Hanni la’e ki’ne
Xaano mine mine
Alba hundi waro
Duuwu no qaete
Mittu loose calla
Duushshawo lowo manna.
Shiima kuleemmo’ne mangittete sokka
Mangitte yitino gaamotenni loosse
Rosiissanni noonke addanko xawisse;
Daga cu’mitino qaaqqimma awisse
Buxima hunate;lophote ha’rate
Mittu ontuy loosse
Muraasa fulteewoota buxima gayyaasse;
Loosuy baraaraasse;giwireno baatte
Ayidde hanni hambo loosunnite saate.
Hattoonni jawaanto
Loosoho dodammo
Duuchu manni taaga irdaatuu dogammo
Xa hattino dino irdaatu baino
Garuy loonsummoro;goxa hoongummoro
Ninke irdaanteemmo; lophote qaanfeemmo
Mootimma lallabbe, tenne kulteewoo raarte.
Cee’ma buxissanno
Mannuy maa’nissanno
Jawa ajishshanno
Saalsiisse shollishshe woroonni qoltanno.
Tenne seekke afe Sidaaminke manni
Loosoho jawaanto ko garinni xaanni.
Duuwu gatenke no
Loosi’ra gattino
Gedensi ilama tenne diaffino
Seekke loosihura heeshsho injitinno!
Looso looso mannu,
Loosuyiho aganu
Loosi’ri manchira kaa’lanno Maganu!
Gashshootu te sokka ki’neno macciishshe
Mangittete biilto dagano kakkayse;
Loosuy jawaachishshe
Loosi’ri mannira baraarshano uyiyye.
Hattoo jawaatona Sidaaminke manni
Isineeto duuwe ollaano duushshanni
Olluunnino sae dikkono fushshanni.
Dikkolla fuliro heewisama noote
Kalqetenni ledo ikkine taaloote.
Tayxe buninkeno deerruy ollohino
Excellence kappi’ra 1_9 geeshsha time diramino.
Kalqe massinkehu ayyidde loosohowe
Xaate konni ka’a loosi’ranno manchi
Lophote ilaala jawaate fulanni
Cee’me loosakkiha isinni kulanni
Jawaatino daafo duucha rosiisanni
Adda togo yaanno wolootta seejjanni
«Hayxu yanna hayxe
Qunqumado shaana
Latisilla laalcho
Daga Fulto halcho.
Qiida waajjitooti
Soodo gutte Kai
Qiida waajjaannohu duuchu buxe bai.
Hayyo kuleemmona maccishshella manna
Qiidu gani’nero uddi’ne imaana.
Laalcholla ikkiro kaasilla baalare
Daga assidhona atenni malaale»
Ki’ne giwirinnuno abbe gari laalcho
Loosidhe daganke fultaawo gede halcho.
Atera yiteeti insa abbitaari
Kaasootto laalchi’ra qarriri heeriro
Ogeeyyeno xa’mi; kaaliiqa maga’ni
Sammi yitootina loosunni jawaati
Laalcho baala kaasi
Mannanke jawaanto
Buxima hunate soodo guto ka’no
Loosoholla gaando
Loonse ka’nummoro kaaliiqa galanto
Sidaamimma latto!
Rosiisaancho Wolde Wonaago
Bakkalcho Woxawaajje 9, 2016 M.D
