Addis Abab:- Dagate riqiwamaano amaale mini Federaalete mootimma 2016M.D xaphooma baajeette 801 Biliyoone birra kaajjishino. Amaalete mini sa’u muli barrubba giddo harisino 28ki uurrinshu songonni 2016M.D Federaalete mootimma xaphooma baajeette 801.6 Biliyoone birra roorima huuronni kaajjishino.
Dagate riqiwamaano amaale mini Mixote, baajeettetenna womaashshu hajubba uurrinshu komite gambisaanchi kalaa Dessaalenyi Wodaajo xawisino garinni; illaallishshu baajeette qixxaawo aana addi addi bissa beeqqitino. Illaallishshu baajeette qixxaabbu yannara mootimmate baajeettete qixxaawo hasiissanno harinshonni sa’ino.
Kalaa Dessaalenyi xawishshi garinni; 2016M.D illaallishshu baajeette illachi hanafantinore latishshu pirojekituwa ijaarshi goofanno gede assate. Aliyye oli korkaatinni gawajjantino qooxeessuwara mannihimmate irko assa, uurrinshuwa wirro gatamara, hattono asale baataet illachinshoonni.
Qoqqowu mootimmuwaranna quchummate gashshoottara gaammoonni baajeette Federeeshinete amaale mini gumulo kaiminniiti yiinohu Uurrinshu komite gambisaanchi; baajeette sai diritenni ledo heewinsiro 15 Biliyoone birra rorrimma leellishshannota xawisino.
2016M.D xaphooma baajeettenni Federaalete mootimma ganyete fulora 370 birra gaammoonniha ikkanna; kaapitaale fulora kayinni 203 Biliyoone birra gaammoonni. Qoqqowubbate mootimmuwaranna quchummate gashshootubbara 214 Biliyoone birra baajeettete irkonna sufino latishshi timo gumulsiisate 14 Biliyoone birra gaamoonnitano xawisino.
2016M.D baajeettete diri Federaalete mootimma ganyetenna kaapitaale fulora xaphoomunni 573.58 Biliyoone birra gaammoonniha ikkanna; rosoho, dooggate, fayyimmate, giwirinnunna way pirojekituwa hattono sagalete wowe buuxisiisate dandiisiissanno Seeftineetete loossara illachinshe gaammoonnita huwachishino.
Ledoteno, miinjunni sufino latishsha buuxisiisate dandiisiissannore laashshaano Industirra halashshate, gobbaydi dikkuwara sonkanni laalchuwanna quchumu latishsha halashshate loossano luphiima qeecha adhitannota coyi’rino.
2016M.D bajeettete fulo lainohunni Federaalete mootimma gobbate giddo eote bu’anninna gobbaydi kaa’lonni 520.6 Biliyoone birra gamba assinanni yine hendanni. Kunino, gobbate giddonni 479.49 Biliyoone birra, irkotenni afi’nanni woxinni 6.43 Biliyoonenna pirojekituwate kaa’lonni 34.77 Biliyoone birra afi’ratenni dimbanni fulo ikkaseno kalaa Dessaalenyi tittirshunni xawisino.
Illaallishshu baajeette diru giddo loosate amandoonnita minjunna dagoomitte lopho olloha assatenna meessaneete dandaate, worroonni faasho harunsitinonna dagate horonsi’raanchimma buuxisate illachinshoonnita ikkaseno qummeessino. Lallawu aana amaalete mini miilla Ella 27/2015M.D Woxu ministere widoonni hala’ladunni hasaambe uurrinshu komitera sayinsoonniti qaangannite.
Amsaalu Felleqe
Bakkalcho Maaja 6, 2015 M.D
