Hawaasa:- Sidaamu qoqqowira noota baattote ruukkimma hedote giddo woratenni saadate jironni gummaamma ikkate aantino Onte dirra giddo 1 Miliyoone ikkitannore sirchonsa woyyeessinoonni saada heedhanno gede jawaante loonseemmo yiino Qoqqowu pirezidaantichi kalaa Desta Ledamo.
Pirezidaantichu tenne coyi’rinohu Qoqqowu Saadate Jiro Latishshi Biiro 2015 baajeettete diri maatete Jireenyi loossa jeefishshinna 2016M.D mixote qixxaawo lainohunni sa’u muli barrubbara Hawaasi quchumira harissino hasaawu ba’re aanaati.
Pirezidaantichu kalaa Desta tenne yannara coyi’ranni; qoqqowoho noota saadate jiro kiirotenni batisa ikkikkinni ruukkadu bayichi aana kiirotenni shiima saada ce’ne gummaa’minanni hayyo kalanqe loonsani hee’noonni. Konni loosinni qoqqowo heewisamaancho assate jawaantetenni loonsanni hee’noonnita qummeessinohu Pirezidaantichu; qoqqowoho aantino Onte dirra giddo 1 Miliyoone saada sirchonsa woyyeessate loonsanni hee’noonni yiino.
“Sidaamu qoqqowi batinye dagate xa’mo qolate luphi yitino sharro assanni afamanno; xaa yannara daganke horonsi’raanchimma deerru deerrunkunni buuxisatenna buxima dhagge assate haammata mixo amande loonsanni afammeemmo” yiino kalaa Desta.
Qoqqowoho Jireenya lamu garinni amande loonsanni hee’noonni. Umihu gutu Jireenya ikkanna daga guto horonsidhannoha safote latishsha halashshatenna mannu ooso heeshshora injiinoha assate loosooti; layinkihu kayinni maatete Jireenya ikkanna mitte mittenti maate sagaletenni umonsa dandiitanno gede sagalete wowe buuxisate; yiino Pirezidaantichu.
Konni kaiminni, qarunni taaltino sagalenni fayyimmansa agarantino qansoota kalaqate ikkinotanna ikkado sagale hee’ra calla ikkikkinni sagalete doorshino hee’ranno gedenna doodhine intanni deerra iillishate hattono heeshshote akata woyyeessatenna ikkado eote bue heedhanno gede faasho amande loonsanni hee’noommo yiinohu pirezidaantichu; kunni baaluri safooti yine hendeemmohu xibbuunni 80% ikkitanno daga heedhannohu baadiyyete ikkasinni lophote kaimu gibrinna ikkasi ammannannita coyi’rino.
Konni ragaani diru dirunkunni 70 kuminni ajjannokkiri sirchonsa woyyeessinoonni siitta qalantanno gede dandiisiissanno loossa mixi’ne loonsanni hee’noonnita kule; sa’u sase dirra giddo loonsoonni loosinni xaa yannara 300 kumi ale ikkannori sirchonsa woyyeessinoonni saada qoqqowoho afantannota qummeessino. Aantanno Shoolenna Onte dirra giddo sirchonsa woyyeessinoonni saada 1 Miliyoone iillishate kaajjinshe loonsanni hee’noonita xawisino.
Qoqqowu Saadate Jiro Latishshi Biiro Sooreessi kalaa Tekile Jomba isi widoonni; 2015 baajeettete dirinni saadate sircho woyyeessatenna maatete Jireenya buuxisiisate ragaanni mixote aleenni gumulloonnita kule; aananno dirinnino baxxinohunni maatete Jjireenyi aana illchinshe loonsannita xawisino. Gumulami baajeettete dirinni qoqqowoho 4 Miliyoone lukkuwa ceate hende wo’munni wo’ma jeefinsoonnita qummeessino.
Sooreessu xawishshi garinni; 101 kume saadate sircho batisate hende 102 kume saadate sircho batinsoonni. Ledoteno, 70 kume siitta qalshiinshoonni. Hattono 39 kume diidu kosho beenkoonniha ikkanna; 2720 Toone malawo latinsoonnita xawise; aantete mixonke maatete Jireenya buuxisate illachinshe loonsannita coyi’rino.
Qiddist Gezaheny
Bakkalcho Maaja 6, 2015 M.D
