Wondo Gennet:- Qoqqowoho sa’u sase dirrara 800 kumi ale ikkanno manna horaameeyye assitino way uurrinshuwa ijaarsineenna horo uytanno gede assinoonnita Sidaamu Qoqqowi Wayinna Wolqate Biiro egensiissu.
Qoqqowoho babbaxxitino qooxeessuwra ijaarroonnita xalalu anganni way uurrinshuwa sa’u muli barrubba giddo faajjetenni maassiinse dagoomaho horo uytanno gede assini yannara Biirote sooreessi kalaa Kebbede Ganoole xawisino garinni; qoqqowoho baxxinohunni sa’u sase dirrara way uurrinshuwa halashshatenni haammata dagoomu bissa horaameeyye assa dandiinoonni.
Xalalu anganni way ragaanni 800 kume ale ikkitanno daga horaameeyye assinoonni yiinohu Biirote Sooreessi; gorsu latishshuwa halashshatennino 15 kume ale hekitaare baatto latisate diizaynetenna xiinxallote loossa loonsoonnita egensiisino.
Ijaarshu looso gundeenna xaa geeshsha dagoomaho horo uytanni noorinna ijaarshu looso gundoonnikkiri 20 ikkitanno way pirojekitubba noota coyi’rinohu Sooreessu kalaa Kebbede; kuri pirojekituwanni xaphoomunni 1 kume hekitaare ale baatto latinsanni yine hendannita xawisino.
Shiilotenna wolqate handaarinnino 240 ale ikkitannori dagoomu bissara doorshu wolqa illinshoonniha ikkanna; 14 kume ikkitanno wedellirano handaarunni loosu kaayyo kalanqoonni yiino.
Industirenna konistiraakshinete shiilo handaarinnino tayxe dirinni 25 miliyoone Birri ale eo afi’noonnita kalaa Kebbede qummeessino.Sidaamu qoqqowo ikke tantanami kawa Wayinna wolqate handaari qoqqowu miinju lophora luphiima qeecha fulanni afamannotano lede coyi’rino.
Amsaalu Felleqe
Bakkalcho Maaja 6, 2015 M.D
