Addis Ababa:- Sidaamu Qoqqowira 2015 M.D kaasate mixo amandoonni chiginye 306 miliyoone giddo 86% ikkitanno chiginye kaansoonnita Sidaamu Qoqqowi Irshunna Kalaqamu Jiro Latishshi Biiro egensiisino. Mitto barano 25 miliyoone chiginye kaasate qixxaawo assinoonnita xawinsoonni.
Biirote Laayinki sooreessi Kalaa Fiqireiyseuusi Ashennaafihu Itophiyu Pireesete Uurrinshara xawisino garinni; 2015 M.D kaasate mixo amandoonni 306 miliyoone chiginye giddo xaa geeshsha 265 miliyoone chiginye kaansoonni; Kunino konne diro kaasate mixi`noonni mixo giddo 86% ikkannota sooreessu caakkeessino.
Xeena balaxe ganino daafira kaashsho Dotteesu aganira hananfe kaansanni keeshshinoonnita qaagiisse; xaphoomu Ministirichi Abiy Ahimed (Dr) assino woshshatto kaiminni maaja 102015 M,D Arrishsho flute e’a geeshsha 25 miliyoone chiginye kaasatenna dirunnita mixono gumulate qixxaawo assinanni hee`noonnita coy`rino.
Kaansanni chiginye gummaame, buna, weesete kaayishshira ikkannohanna bushsha shaqqishshannota gobbate giddo mu`rino haqqa karsine kaansannita kulinohu Laayinki sooreessi, konne diro kaansanni xaphoomu chiginye giddo xibuunni 34 anga ikkannohu gobbate giddo haqqaati. Albillichono, miinju aana horo noo gobbate giddo chiginyera balaxo uyne kaasate loonsanni yiino.
Haanja haruma maatete latishshi ledo xaadisateni loonsanni yiinohu Kalaa Fiqireyesuusi, chiginye qixxeessatenni, hiratenninna shiqishatenni bobbakkino qansootino gummaama ikkitanni no. Qoqqowu gummaammu laalchira injiinohanna qooxeessaho Yirgaalamete Agiro Industirete Paarke noohura, looso gummaamo assanni noota xawisino.
Sidaamu Qoqqowira haanju harumi pirogiraamera luphi yiino manni kakkaooshshinni massagamanni noota kulinohu Laayinkihu Biirote Sooreessi, konne diro chiginye kaasate pirogiraame aana 1.3 miliyoone daga beeqqaano ikkitannni afantanno.
Gutu baatto aana kaansanni chiginye agurranna quchumu teessaano ikkitino qansooti 2 chiginye, baaddiyyete teessaano qolte 50 chiginye gatensa kaassanno gede assate millimmo assinanni hee`noonnita Kalaa Fiqireyesuusi xawisino. Chiginye kaasate sa`ne awuutanna towaata hattono agarooshshe assa hasiissannota coy`re, baalunku kaasate assineemmo sharro lende awuuntanninna agarranni guma abbate loonso yee woshshatto assino.
Sidaamu Qoqqowira umi dooycho haanju harumi pirogiraamera 936 miliyoone chiginye kaasate mixo amande, 850 mmiliyoone chiginye kaasate dandiinoonnita qaagiissinohu Biironnihu Laayinki Sooreesi, kaansoonni chiginye giddo 5 miliyoone chiginye miinju horo noo gummaame chiginye ikkitinota xawisino.
Abrahaam Saamueel
Bakkalcho Maaja 6, 2015 M.D
