Hawaasa:- Qoqqowoho Rosu isilanchimma buuxisiisate rosu minna safote latishsha woyyeessatenna iillo halashshate illachinshe loonsanni hee’noonnita Sidaamu Qoqqowi Rosu Biiro egensiissu.
Qoqqowu Rosu Biiro “Roso Ilamate” yaanno uminni rosu minna safote latishsha woyyeessatenna iillo halashshate qixxaabbino millimillote bare sa’u Sanyote barra Hawaasi quchumira faajjetenni harinssino. Millimillote barera leelle hasaawa assinohu Qoqqowu Pirezidaantichi Kalaa Desta Ledamo coyi’ranni; heewisamaancho ilama kalqate rosunni irkisama doorshu nookki hajooti yiino.
Qoqqowu gede xaa geeshsha noota rosu millimillo keenne la’nummo woyte ilama badhe higge gattanni noo gede buuxate dandiinoommo yiinohu Pirezidaantichu; konne qarrano tiratenna rosu aana jirsa karate 2013M.D goofimarchira hananfe qoqqowu deerrinni Rosu gaado fannoommo yiino.
Ilamate ille fanate ‘’Sidaamu Rosu Haaroonshi’’ woshshatto ayirrisse dureeyye uytino dancha dawaronninna mootimmate loosaasine wo’minonsakkihu aaninni xeisse assitino irkonni rosu handaarinni hexxo aanno gumi leellino. Kunino dhagge habbannokki loosooti yaanniiti xawisinohu pirezidaantichu.
Baadiyyeteno ikko quchummate taalcho roso ilamate iillishate mixi’ne loonsanni hee’noonnita lede xawisinohu Pirezidaantichu Kalaa Desta; kunino halammenna mittimma heedhuro Sidaamu daga hasatto harancho yanna giddo jeefisa dandiinannita buuxisinoho yiino.
Bare massagginoti IFDR Quchumunna Safote Latishshi Ministiricho Baabba Caaltu Saani ise widoonni; kalqete dhaggenni buxima dhagge assa dandiitino gobbuwa fojo rosu aana loossino loosooti yitino. Wolapho keeraancho sharrotenni abba dandiininte gede rosu isilanchimma daafira heda hananfoommero techo gobbate gede e’noommo xurqaani qarri giddora die’neemmonkanni yitino; Ministircho.
‘’Kalqe tini ilamate taraawootino yitinoti Ministiricho; bero maatenke xe’nensanni xeisse ninke rosiisa dandiitinohu ga’a Itophiya seedisse la’e bero loosse gobba techo ninkera tareessitino. Techo Itophiyi eeggo noonkehu ninke techo ilama angaati. Ninkeno tenne eeggo hiittoonni tareessineemmo yaannoha wodanchine la”a hasiissanno’’ yitino.
Gobba sufisiisatenna ga’a ilama qaagate dhagge habbannokki haruma wore sa”a hasiissannotano huwachishshino. Kalqe heewotenni wo’mitinota ikkitinonte gede, tenne heeworano ikkadda mannu wolqa kalaqatenni ilama heewisamaancho assa hoongummoro ilama badhera ba’anno yiinohu kayinni Qoqqowu Aantichu Pirezidaantichinna Rosu Biiro Sooreessi Kalaa Bayyani Baraasiho.
Soorrote kawa gobbate gede assinanni hee’noonni batinye soorro mereerinni rosoho baxxino garinni illacha tunge loonsanni hee’noonni gede qummeessinohu Kalaa Bayyani; Qoqqowu gede Sidaamu roso woyyeessate saiha lame diro iibbado millimillo giddo sayinsoonnita coyi’rino.
Qoqqowoho Rosu isilanchimmanna iillo millimillorano rooru manni dhukisi deerrinni qeechasi fulanni afamannota qummeessinohu Biirote sooreessi; xaa geeshsha konni dhaggete harumira beeqqaancho ikkinokkihu heeriro beeqqaancho ikkanno gede sokkasi saysino. Jeefoteno, Sidaamu Rosu Haaroonshira qeechansa fultino hallanya dureeyyeranna uurrinshubbara Biiro galatanna afamishsha uytino.
Addisu Adoola
Bakkalcho Maaja 6, 2015 M.D
