Addis Ababa: – Danna taayisse sa`anno waay gobbuwa xaadooshshe kaajjishatenna gutu horaamimma buuxisate Itophiyu Naayile Komishiine uurrisate dipolomaasawete wo`naalsha kaajjishshe suffanni noota Gobbaydi Hajo Ministeere Afiriku Dayirekterichi Jeneraal Ambaasadder Fissehi Shawolihu egensiisino.
Gobbaydi Hajo Ministeere Afiriku Dayrektoreete Dayrekterichi Jeneraalichu Ambasaddere Fissehi Shawolihu xawisanni, Gibitse agurranna baalanti waay gobbuwa diilallote gade soorro abbitanno dano, sagalete umo dandaa buuxisatenna konninni wolqate shiqqo qineessate danna sa`ne loosate halamme, hasaawa, gade soorrira gutu latishsha latisate sumuu yitinoreeti.
Ambasaadder Fissehi xawishshi garinni, Aropu kiironni 1999 M.D malaatinsoonnihu Abbayi way aana komishiine urrinsanni gede xa`manno. Komishiine 11 wayi gobbuwa waa latisanna jireenya abbate halammetenni pirojektuwa soorri`nanni battalaati. Konne loosu aana hosiisa hasiissanno. Muli yannara mitte gobba ledo malaatinse halammenna gutunni horaameeyye ikkate Itophiyu dipolomaasawete wo`naalsha suffino.
Horo wayii gobbuwa baalate ikkinohura, Naayili komishiine uurrinsanniha ikkanno yiinohu Ambasaaddarchu, gobbuwano Naayili Komishiine horo huwata dandaa noonsata kulino. Baayridihu Abbayi Kofatto ijaari dannu qooxeessira nooha ikkinota kulinou Ambsaaddarchu, wolootta Itophiyu pirojektuwa dannu ledo amadantinoreeti. Gobbankera horo uytaranna wolootu ledono xaadooshshe kalanqe insano horaameeyye ikkitanno gedenna buusa assate hende loonsannire ikkinota huwachshino.
Itophiyu Abbayi way Afiriku waanna jiro ikkinohura, Afiriku mittimma amadino garinni sasu waati hasaawinni ammantannota xawise, hajo wolu ragira qola hasiissannokkita buuxisino. Konneno babbaxitino yannara way songo qixxeessatenni waay gobbuwa huwanyo afidhanno gede assate looso loonsoonni.
Wolootu qarqari gede mittu dani komishiine uurrisatenni mitte gobba kofatonna irshi wolootu gobba horo ledo gaacamikkinni mittimmatenni qooxessinsanna dagansa latisha buuxisate Nayili mittima hee`ra hasiissannote yiinohu Ambasaadderi Fissehi, Abbay way gobbuwa xaaddanno way lagi ledo mittimmatenni loosira dandiitanno gede Komishiine uurrisatenni gutu horaamimmara loosa noonke yiino.
Ambasadderchu xawishshi garinni, Abbayi halamme sumimmenna wolootta sumimmeno loosu aana hossannokki gede Gibtse xiiwo assitanni no. Way 11 gobbuwara owaante aa heedheennasinni ani calla horoonsireemma yitanni Gibtse qarrisse no. Way mitte gobbaha calla ikkinokkita xawise, wolootta gobbuwa hedote giddo worroonnikki horoonsi`ra adhamooshshu nookkita baalunku way gobbuwa ammantanno yiino.
Ninke Itophiyu, Abbayi kofatto shoollki dooychora waa wonshate qixxaambe hee`noommo yiinohu Ambaasadderichu Fissehi, shoolki dooyichora waa wonshini gedensaanni kofatto albillicho mite huluullo nookkiha hegersitino doogonni horosi buunxannita coy`rino. Kofatto Itophiyu horo wo`munni wo`ma buuxisate gamba yee no. danna sa`e hadhanno lagga widoonni Itophiyu amadino uurrinsha aliyye way gobbuwa irkissinota xawisino.
Abrahaam Saamueel
Bakkalcho Ella 29, 2015 M.D
