Addis Ababa:- Qoqqowoho Zoonnate tantano safote amuraateno qoqqowu pirezidaantichi kalaa Desta Ledamonna woloottuno mootimmate loosu massagaano leeltinowa sa’u muli barrubba giddo faajjetenni maassi’ne fano assinoonni.
Zoonnate tantano Sidaamu latishsha buuxisiisate assinanni bilchaante irkissanno yine agarranni. Qoqqowu mootimma safama adda ikkitu kawa mootimma dagate e’ino sheemaate kaima assatenni latishshunna danchu gashshooti xa’mo ikkadimmatenni dawarate loossanni afantanno.
Mootimma amaddino ajuujanna mixo loosunni leellishatenna qara qara ikkitino dagate xa’mubba dawarate bilchaantetenni loossanni afantannotano zoonnate tantano faajjetenni maassiinssi yannara xawinsoonni.
Qoqqowu dagoomira hasiissanno owaante sufino garinni aate hayyo kalaqate dagate ledo mittimmate loosa kaajjinshe sufateno tantano daganniwa shiqqi assinanni zoonna tantana noose qeechi luphiima ikkinota maassote amuraati aana qummeessinoonni.
Konni garinni,
1. Dr Maatte Mangasha; Soojjaati Sidaami Zoone Qara gashshaancho. Mereershu Bansa Daayye,
2. Kalaa Mangasha Fiitamo; Wodiidi Sidaami Zoone qara Gashshaancho. Mereersha Alatta Wondo,
3. Kalaa Mangistu Maatiwoos; Mereeri Sidaami Zoone qara gashshaancho. Mereersha Yirgaalame, hattono,
4. Kalaa Addisu Qaa’miso; Aliyye Sidaami Zoone Qara gashshaancho assine mootoonsinoonniha ikkanna; zoonete Mereershino Hawaasa ikkinota afate dandiinoonni.
Gaazeexu Odeessaanchinni
Bakkalcho Ella 29, 2015 M.D
