Addis Ababa:- Woyyaawino Itophiya ijaarsate, balanxe woyyaabbino rosu minna gutunni ijaarsa noonke yee Xaphoomu Ministerich Dokter Abiy Ahimed woshshatto assino. Xaphoomu Ministerichi gobboomu deerrinni rosu minna deerra woyyeessate assinanni gobboomu millimmo faajjetenni hanafisiisino.
Xaphoomu Ministerichi Abiy Ahimedihu, “Rosu ilamate” yaanno uminni faajje assinoonni gobboomu millimmo hanafisiisanni yiinonte gede; Rosu nookkiha wolere halashsha dagganno kalqe ledo heewisama dandiinannikki daafira, rosu daafira techo assa hasiissannonke coyee fula noonke. Woyyaawino Itophiya iajjrsate balanxe woyyaabbino rosu minna mittimmatenni ijaarsa hasiissannonke yiino.
Itophiyu gobba baalate rosinnohu baalisi bero rossinoonni rosu minna techo irko hasidhannote yiinohu Xaphoomu Ministerichi, xaa yannara daga, mootimmanna dancha fajjo aana loossanno uurrinshuwanna hallanyooti ledo halamme roso halashsha hoongummoro dagganno kalqe ledo heewisama dandiinannikkita xawisino.
Rosu Minna deerra woyyeessate assinanniha gobboomu milimmo rosu isilanchimma agarate kaa`lannota qummeesse, qaxarante loossanno qansooti ikkadda ikkitanno gede laashshate halamme rosu xinta tuga noonke yiino. Itophiyaho yannicha rosu dana hananfi yannara, sasu bissa jawa qeecha fultinota qaagiissinohu Dr Abiy; tinino daga, mootimma, dancha fajjo aana loossanno uurrinsha ikkitinota kulino.
Xaano tini bissa gobba baalate rosu minna deerra woyyeessate assinanni gobboomu millimmora jawa qeecha fulatenni woyyaawino Itophiya ijaarre woyyaabbino rosu minna mittimmatenni ijaarro yiino Xaphoomu Ministerichi.
Kaa`lone loosu aana leellishate baalunku hedotenni, woxunni, wolqatenni hattono noonke dhuka horoonsi`ne rosu minna aana hosiisate dandisiisannoha “Rosu Ilamate” yitanno gobboomu millimmo aana beeqqaano ikka hasiissanno`ne yee woshshatto assino.
Rosu Ministeere Ministerchi Pirofeseer Birhaanu Naggihu isi widoonni, rosu isilanchimmate qarri kaimi haammata ikkirono, rosu minna rosatenna rosiisate injiitinokkita ikka noo qarri giddo mitto ikkinota xawise, 86 xibbunni, ale ikkkitanno rosaano uminna mereerimu deeri rosu minna xintu latishshi noonsakki daafira rosaano qarrantanni rossanni no.
Rosu minna xintu latishsa woyyeessatenninna ijaarate loosi mootimmate calla tunge agurranniha ikkikkinni, baalunku Itophiyu qansooti woxu noosihu, hedo noosihu, wolqa noosihu assinanni hee`noonni millimmo aana beeqqaancho ikkanno gede woshshatto assino.
Millimmo, albi rosaano, macca hallanyooti, gobbaani heedhanno Itophiyu qansooti, dureeyye, hattono wolootuno dagate bissa ilantino qaera rosu minna xintu latishsha wonshatenni qeechansa fula noonsata xawisino. Rosu minna giddo leellannohu xintu latishshi qarri mereero rosu minna ijaari diigama, xalalu way anje hee`ra, shumate mini hooga, caabbichunna hattono rosu uduunni anje haammate leelltanno.
Millimmo qara gede hasiisssinohu konne qarra tiratenna yannicha rosu minna ijaarate ikkinota huwachishino. Rosu Ministeere millimmote hasiishsha shota doogonnni qineessate dandisiissannota Webe-saayte portaale qixxeessite bero barra owaante hanafinota faajje assitino.
Abrahaam Saamueel
Bakkalcho Ella 29, 2015 M.D
