Addis Ababa:- Quchumaho 550 miliyoone birri ale fulo assine ijaarroonniri babbaxxitino pirojekituwa Qoqqowu pirezidaantichi kalaa Desta Ledamonna woloottuno luphiima mootimmate loosu massagaano leeltinowa tenne lamalara maassante dagoomaho owaantete fano ikkitino.
Quchumaho ijaarsha hananfoonniri mereerinni 16 pirojekituwa ijaarshi goofinotano xawinsoonni. Kuri pirojekituwa mereerinni 90 miliyoone birra fulo assine ijaarroonniti Addis Ababunni Hawaasi quchuma e’nanni furcho Miliniyeeme paarke afantannota Quchumu Gashshooti Quchumu Latishshinna Konistiraakishiinete Biddishshi egensiisino.
Biddishshu laynki sooreessinna gumulsiisate dhuki gatamarshinna qooxeessu latishshi handaari sooreessi kalaa Taariku Taammene baxxinohunni Itophiyu pireesete uurrinshara xawisino garinni; quchumaho sai 2014M.D hananfoonnita babbaxxitino pirojekitubba konni dirinni ijaarshu loosi goofeenna maassiinse dagoomaho owaantete fano assa hananfoonni.
Quchumaho 29 pirojekitubba quchummate uurrinshu safote latishshuwa halashsho pirogiraame (UIIDP)ni irkisantannoti noota xawisinohu kalaa Taariku; kuri mereerinni culuuta doogo calla agurranna wolootta pirojekitubba ijaarshi goofeenna konni diriinni maassantannota egensiisino.
Baalante pirojekitubbanni baxxannohunna Addis Ababunni Hawaasira e’nanni furchora ijaarroonniti Sidaamu bude, dhaggenna balchooma egensiissannoti Miliniyeeme paarke ijaarshu looso sai Ella agani 2014M.D hananfeenna isilanchimma agarino garinni hattono murroonni yanna giddo loonse gudate wo’naalloonnita xawisinohu sooreessu; xaphoomunni 90 miliyoone birri ale fulo assatenni ijaarroonnitano qummeessino.
Addis Ababunni Sidaamu qoqqowi qara quchuma Hawaasa eessitanno kalqoomu doogo aana Xiqur wuha yaamamanno qooxeessira ijaarroonnitinna Sidaamu bude, dhaggenna balchooma egensiissannoti tini Miliniyeeme paarke labbanno pirojekituwanni ledo heewinsiro Itophiyunnino sa’e Soojjaati Afrikira albisa ikkitanno yine hendannitano kalaa Taariku lede xawisino.
Hawaasi quchumira sai 2014M.D hananfe mittu diri giddo ijaarsha gudatenni maassiinsoonniri pirojekituwa mereerinni Miliniyeeme paarke lede seesallichu kinchi doogga, qansootaho loosu kaayyo kalaqate hende ijaarroonni Sheedubba, quchumu taakse terminaale, daga gangalattanno bayichubba, tiraafiiketenna dooggate qacce caabbichuwa, hattono yannaasincho lekkaasinu doogganna woloottuno owaante uytanno uurrinshuwa afantannota sooreessu kalaa Taariku lede egensiisino.
Amsaalu Felleqe
Bakkalcho Ella 29, 2015 M.D
