Hawaasa:- Sidaamu Baanke tuqishshase ledatenninna yannitte loosu hayyo horonsi’ratenni gobbate noo fayinaansete amanyoote yannoonsate umise qeechi nooseta xawinsi. Baanke sayinsummo sanyo barra Hawaasa Allaamura leellanno umise ijaara maassiisatenni faajjetenni owaante aa hanaffino
Hanafisiisate amuraati aana biheeraawe Baanke layinki gashshaanchi kalaa Selemoon Desta coyi`rino garinni; sa`u onte dirra giddo gumulloonni rifoormete loosinni manaadda fayinaansete uurrinshanni Baankete widira reekkamasenni onte baankuwa giddonni Sidaamu Baanke umite.
Sidaamu Baanke biheeraawe Baankenni harancho yanna giddo afamishsha afi’ratenni seyote iillitino Baanke ikkase xawise; gobba hanaffinnoha miinjitte lopho hattono yannaasincho Baankete tuqishsha hala`ladunni shiqishate luphiimu qeechi hee`rannose yiino. Biheeraawe Baanke irko baxxitannosekkitano qaale e“ino.
Sidaamu qoqqowu pirezidaantichi kalaa Desta Ledamo isi widoonni; Sidaamu Baanke qoqqowu harisanni noota miinjitte lopho kaajjishannoho. Konnirano qoqqowu gashshooti Baankete hasiisanno qooda fushshatenni adda ikkitanno gede dandiisino yiino.
Baanke dagate baankeeti yiinohu pirezidaantichu; heewisamaancho, tuqaanchonna lifixa hattono islaanchimma noose owaante aatenni qoqqowoho noo kuusamino dhuka horonsiratenni konni aleenni ikkino garinni sinna baalante gobbuwara diriirsatenni gobbate miinji millimmo giddo qeechase fultannota coyi`rino.
Baanke Biheeraawe Baanke wortino wodho harancho yanna giddo wonshatenni baankimmate owaante aa hanafa jawa seyooti yiinohu Sidaamu Baanke Pirezidaantichi kalaa Taaddese Haxiyyaati. Konnirano tuqishshase ledatenninna yannitte loosu hayyo horonsi’ratenni gobbate noo fayinaansete amanyoote yannoonsate umise qeechi noose yiino.
Baanke baalante gobbate kifillara afantanno lame kume meddi yitanno gutamaanonni gamba assinoonni 1.5 biliyoonenni malaatinsoonninna 1 biliyoone ale kaappitaale amadde Sidaamu mayikiro fayinaansete uurrinshanni reekkantino Baanke ikkase xawisino Kalaa Taaddese.
Baanke onte kume ale ikkitanno dagoomu kifillara liqoote owaante aatenni horaameeyye assitinnota ikkase xawise; aantete tuqaanchonna yannaasincho owaantubba halashshatenni loonsannita coyi`rino Pirezidaantichu. Aanino dirinni 2.5 biliyoone ale liqoo aate mixi`noonnita xawisinohu kalaa Taaddese; baankete owaante hiittenne baankete uurrinsha widoonni horonsi’ra dandiisanno amanyooti baxxinoha assannoseta egensiisino.
Gamba yino Baankete wodhote woxi bikka boco miliyoone ale iillinotano buuxisino. Baankete boordete gambisaanchi kalaa Abrihaam Marshaallo barete aana xawisino garinni; Baanke Biheeraawe Baankenni uyinoonnise wodho harancho yanna giddo wonshite Baankete owaante aa hanaffino.
Baanke hala`ladunni baadiyyete heedhanno dagoomu kifillara tuqqanno assate, meyaata loosu kalaqaanonna hornyuwa leddannonna gobboomittete miinji horo noonsa fulote laalchinna owaantubba hattono manaaddanna mereerima daddalu handaarra aana ikkatenni fulote laalchinna owaantubba aana bobbakkino jajjabba daddalu fajjo noonsare illacha assatenni loossannotano egensiisino.
Sidaamu Baanke baankimmate daddali fajjo afidhunkunni kayise 16 sinna 90 kumi ali suuqote owaatamaanaano nooseta xawise; aanino dirira Baankete owaante uyitanno sinna 100 ale iillishatenna owaatamaano mitte miliyoone widoogge iillishate illachunni loonsanni afammannita egensiisino.
Abbebech Maatewoos
Bakkalcho Ella 29, 2015 M.D
