Hawaasa:- Sidaamu umosi umisinni gashshara assinoonni sharronna leeltino mittimma latishshunni ledama noose yee Sidaamu qoqqowu pirezidaantichi kalaa Desta Ledamo coyi’ri. Ella 27 Sidaamu dagara dhaggete barranna qaraartino sharro jeefo ikkinota coyi`rino.
Sidaamu qoqqowi mootimma safamino barra Ella 27 korkaata assatenni Hawaasa budu harira harinsoonni hasaawi aana qoqqowu pirezidaantichi kalaa Desta Ledamo coyi`rino garinni; Ella 27 Sidaamaho dhaggete barraati; wolaphote qaraartino sharro jeefo afidhino barraati. Sidaamu daga umose umisenni gashshate assitinota qaraartino sharronna mittimma jireenyunnino leda hasiissanno.
Barru Sidaamu taalleenyira waaga baantoonni barraati. Waaguno lubbotenna mundeete waagaati yiinohu pirezidaantichu; ka`noommowa afanna iillineemmowano xeertinse la“a hasiissanno yiino. Togo assa aantino harinshora dhuka ikkannotano xawisino.
Kalaa Desta xawishshi garinni; Sidaamu daga halcho jawate. Halchose kayinni guma laaltannohu ninke oososenniiti. Konnirano murciraanchimmatenni ka“a hasiissannonke. Mittimmatenninna suwashsho doogonni ha’nummoro jireenyinke xeertonniha dikkanno
Macciishshamanna ayirrisama jireenyu safo ikkansanni, konni loosira meessaneete qixxeessanna mittimma kalaqa hasiissannota huwachishino. Techoora iillinoommohu sharro gutunni assine mittimmatenni sigiigankenniiti yiinohu pirezidaantichu; baalunku bobbahino loosu handaarinni kaajje loosa hasiissannosita qummi assino.
Qoqqowu xa`mora leeltino mittimmanna kakkaooshshu latishshinkerano ledama noosita qummi asse; baalanti qoqqowu giddo heedhanno teessaanono aanino loosiranna seyoote qixxaabbanno gede woshshatto shiqishino.
Qoqqowu tantaname faajjetenni safamihu gedensaanni afi`noonnita poletikunna miinjittete horo lainohunni hasaawinsoommori babbaxxitino qoqqowu teessaano barru jawiiditi xa`monke dawaro afidhinoho yitino. Jawiiditinna qara bixxille Sidaamunniti 130 dirra kiirsiissino xa`mo dawaramase ikkinota kulte; kunino daga umose umisenni gashshate qoossose afidhanno gede poletiku geanni la`nanni seyoo ikkitinotano xawissino.
Daalle woradinni barete leellinohu baatto loosi`re galannohu Mengistu Aliito; techo dawaro afi`noommonna xa`monke higgino sayikki diro ayirrinseemmo woyte jawu hagiirrinniiti yiino. Qoqqowoho babbaxxitino latishshu loossa loosantanni noota kule; baxxinohunnino qooxeessisira famannoha Gidaabo xashsho darreennasi gorsu loosinni owaatamanninna dikkossino lossanni noota coyi`rino.
Isi yaanno garinni; intannirinna anganniri oososira hanqata hoogirono; wedellunniti loosu hoonge huluullissannosi. Ooso rosse looso amadduro maatete hagiirreho; ikkolla ikkinnina qoqqowu gede calla ikkikkinni gobbate gede qarra ikkitino loosu hoonge hajora mala uyineemmero danchaho.
Wolu Gorchee woradi teessaanchinna baatto loosi`re galannohu Geetaachew Dooyyamoha ikkanna; isino baatto loosi`re galannohu Mengistu gede qoqqowoho afaminohu Sidaamu qoqqowi safamino sayikki diro ayirrisatenna hagiirresi xawisateeti; sannate xa`mo dawarantino sayikki diro ayirrinsanni woyteno haaru qoqqowi gede ikkikkinni qoqqowoho ikkanno loosi loosamanni noota coyi`re; konnirano qoqqowu massagaanonna federaalete mootimma galatannota coyi`rino.
Kuni danchu loosi agaramino gedeenni hee`reenna qoqqowoho leellannohu loosu hoonge qarri tidhamarano woshshatto shiqishino. Barraho qoqqowu fayinaansete biro sooreessi dokiter Araarso Gerremew, qoqqowunnita sasu diri harinshonna afi`noonni guma lainohunni kaimu borro hasaawaho shiqishino. Sidaamu qoqqowunni safamino sayikki diro barra ella 27 babbaxxitino piroojekitubba maassiisatenninna hasaawunni ayirre hosino.
Qiddist Gezzaheny
Bakkalcho Ella 29, 2015 M.D
