Abbebech Maatewoos
Addis Ababa:- 1444ki Hijiru diro Iid Al Adaha Arafu ayyaana Addis Ababu istediyemera amma’note harunsaano noowa iibbadu garinni ayirrinsoonni.
1444ki Hijiru diro Iid Al Adaha (Arafu) ayyaani salaatu amanyoote Addis Ababu Isliminnu hajubba luphiima amaalete mini pirezidaantichi Sheh Sulxaan Amaan Eebba, Ustaaz Abubekeri lede luphiima Isliminnu massagaanonna amma’note harunsaano afantinowa beroo barra ayirrinsoonni.
Addis Ababu Isliminnu hajubba luphiima amaalete mini pirezidaantichi Sheh Sulxaan Amaan xawisino garinni; Amma’naano salaatu gedensaanni mininsara higganno woyte gorro harisatenninna noonsakkirira beehatenni ayyaana sayissanno.
Sheh Sulxaan xawishshi garinni Arafu ayyaani masaalaanchu Ibrahiim beettosi kakkalate assino lawishshimmanni daynohonna ayirrisamannoho. Arafu salaata salaantihu gedensaanni Musliimete daga mininsara haratenni gorro gumulatenni qarramino manni ledo gutunni ayirrinsanni. Ikkinohurano ayyaanaho gorro gorra suna ikkasinni baalunku minisira hige gorro gorranno ayyaanaati yitino.
Musliime daga ayyaana ayirrissanno woyte olliise ledo, qarrantino buxanenna maate noonsakki qaaqquulli ledo ikkatenni gutunni ayirrisa hasiissannota xawise; Itophiyimmate mittimma kaajjishatenni halamatenni baxamate ayyaaninni ayirrisa hasiissannotano lede qummeessino.
Ayyaanaho qixxaabbino gorro wolootu ledo hurbaaxxa Isliminnu rosiiso ikkase xawisatenni sasu giddonni mitto olliicho, qarraminohuranna gorrira dadiitannokkirira, kaa’lannohu noonsakki mannootira aatenni gatinoha maatete ledo mitteenni hurbaaxxa hasiissannota huwachishino.
Halamanna mittimma ayyaanu yannara calla ikkitukkinni ayyaanu gobbaannino hasiissannoreeti yiinohu Sheh Sulxaan; halamanna kaa’lamatenni ayyaana gutunni sayisa gobboomitte gadachonkeeti yiino.
Itophiyu Federaalete Mejliise dagate xaadooshshi isi widoonni; Musliimete dagawa Iid Al Arafu onte Isliminnu assootubba giddonni mittoho. Kunino masaalaanchu Ibrahiimiwinni beettosi kakkalo assate assino lawishshimmanni daynoho.
Arafu ayyaani jawa rosicho aannonna mannootu ammantino coyira waaga baattannoha ikkasi la”noonniho yiinohu Abbadira Dura baxxinohunnino Musliimete dagawa noosihu noosikkihura beehannonna gutunni ikkatenni hagiirrunni ayirrinsanni ayyaanaati yiino.
Musliimete daga olliichisi, wolootta amma’note harunsaano baxillaanonsa ledo ikkatenni hurbaate beeqqite ayirrissannoho. Baxxinohunnino gobbate gede mannootu amma’note ayyaanna wolootta wole amma’no harunsitannori ledo gutunni ikkatenni sayissannoha ikkasino xawisino.
Bakkalcho Ella 22, 2015
