– (IFDR Xaphoomu ministirichi Dr.Abiy Ahimed 1444ki Iid Al Adaha ayyaana korkaata assatenni sayisino wo’ma sokka)
Hawalle bayiriidi Iid Ali Adaha (Arafu) ayyaanira iillishine
Muxxe Roduuwu Itophiyu musliime daga’ya
Iid Al Aaha, Arafu musliimootu bayiru ayirrinyinninna baxillunni ayirrissanno, kakkalamooshshe kulanno ayyaanaati. Ayyaanu onte isliminnu kaimubba mereerinni mitto ikkinohunna hiikku Isliimino woxunna wolqa fajjitusi bikkanni heeshshosi dirinni ajanni ajeenna mitte hige Mekka hodhatenni gumulanno gede agarrannisi Haaji amanyoote harinsanniwanna gumullanni bayira gafaati.
Arafu, manchi beetti kaaliiqisiranna ammanosira yee shetto adhate, hasiisirono kakkalamate noosi fajjimma qaangeemmo, ayirrinseemmo, kulleemmo addi barraati. Allah (Subihaana wetealla), masaalaanchu Ibrahiimi beettokki kakkalie yee hajajisita, masaalaanchu Ibrahiimi annimmate dadillu diqeelinosi; beettisi baxilli didoginosi, minisi diigama diyaachishshinosi; hiitti hajono kaaliiqi hajajonni diroortannona, mitto beettosi Ismaeeli kakkalate kai. Beettisi Ismaeelino kakkalamate qixxaawa ikkinonka. Iid Al Adaha kakkalote ayyaanaati yinannihuno konniraati.
Itophiyu daga tenne birqiiqi Isliminnu dhaggewinni lame jajjabba coyibba ronsoommo. Culku giiratenni jifamannonte gede baala mannuno qarrissanno yannanni jifamanno. Ismaeeli gede noosire baala ee kakkalamate mudhinohu jifo sae, jawa dhagge borreesse, Iid Al Adaha labbino qaaggo tirfi’re, sannate giddo qaagamanni hee’ranno. Kakkalooshshe waajjinohu, ayirrunyunni xeerti’re, dhaggete aaninni hunneenna bukote gede ikkanno.
Layinki rosichi bayira eo aana iillinannihu banxannihu nafa gatikkinni sayise aatenni ikkasiiti. Masaalaanchu Ibrahiimi Ismaeelira bikkinannikki baxilli noosinka. Jawa doogonsa kayinni kaaliqisi Allah fajjo gumulateeti. Tenne hajajo gumulate yee baattote aana jawa jirosi asse kiirannoha Ismaeeli kakkalate mudhi.
Kakkalooshshu ayyaana ayirrinsanni konni addi barrinni, Itophiyu daga mimmitu ledo “Hawalle Iillishi`ne” yitara calla ikkitukkinni lamenta qara coyibba wodanchitara maganye yeemmo. Bayiriidi hajora jifama, bayira hajora kakkalo ikkate qixxaawa bayiruuddu manni gumulannonna dhagge loosino balchoomaati. Bayira hajora yine banxannihu nafa gatikkinni kakkalate mudhano kalqe soorritanno dhagge loossannori baalu gumultannoho.
Gobbanke babbaxxitino yannara babbaxxino qarrubba xaaddese egentino. Sa’nannita labbannokki jifubba yanna yannatenni danqarantuserono; qarrubbanna jifubba mitto mittonka sa’e albira hodhate aana no. Qarru bati’rino yannarano qansootise goofimarchu kakkalamooshshe baatate badhe dihiggino. Jajjansa calla ikkikkinni lubbonsa aate komo diyitino. Itophiya kawa iillishshinori, oosichonsa lede baattino oosose ikkansa mamooteno kullanna heedhanno xabbino dhaggenkeeti.
Itophiyu daga umose kakkalo assitanno. Baxxanno coyeno gobbansara yite kakkaltanno.
Techo, bayiriidi kakkalooshshu ayyaani aana uurrine baalanka ayirrinyunni qaangeemmo.
Wirro hawalle Iid Al Adaha/Arafu ayyaanira iillishi’ne!
Kakkalo nookkiha kaajjitino gobba, jiroo’mitino daga kalaqete aana dino. Kalqe qaaffino lophote deerri baalu kakkalooshshu gumaati. Xa iillinoommo deerrira iillineemmo gede baca daga umonsano baxxanno coyeno kakkalo assitino. Hee’ratenni rooranno illachira yite muxxe ikkitino lubbo baattino. Gobba gobba ikkitannohu yannansa, wolqansa, egennonsanna sa”eno heeshshonsa kakkalote shiqishshannota baca ooso kalaqa dandiiturooti. Mittu woleho reyaa, mittu woleho aa, mittu woleho beeha, mittu woleho yee waaga baatate qajeelle kaajjado xinta aana uurrisinohu.
Kipho, gaance, babbadamanna xixxiiwama kakkalooshu noo basera diheedhanno;Kuri honqooqimmate gummaati. Togoo daniha bayira kakkalonni wo’mino baxille ayirrinsanni ayyaannira hiikkono ikko hiikko gibbo duduwa cubboho.
babbadamanna xixxiiwama duduwa bunshete. Itophiyu ay coyinnino aleenni xa hasidhannohu baxillenna dagase mittimmaati.
Addaaminna Hawwa shorrantuhu gedensaanni xaaddinowa Arafu gaarira baalante kalqenni gamba yitino Isiliimooti Iid Al Adaha ayyaana mittimmatenni ayirrissanno.
Buensa babbaxxitinota, kuulinsa babbaxxinoha, qansichimmansa babbaxxitinota, ayimmansa babbaxxitinota ikkiturono; baalunku heddannohu Islilaama ikkansa callaati.
Babbaxxitinowa habbe xaaddinowa, mittoo’mitinowa heddanni mitto ikkitanno. Ninkeno babbaxxinannihura ikkikkinni xaadisannonkehura, xixxiiwammannihura ikkikkinni halammeemmohura balaxo uyine mitte jawa daga ikkino.
Addi addi bayichinni dangummorono, babbaxxitino ayimma heedhunkerono, babbaxxino afiinni coyi’nummorono, babbaxxitino amma’no harunsinummorono Itophiya yinanni woyte mitto ikkino.
Kuni ollii kuni qachi aneho yaa agurre Itophiyu ninkete yineemmo qansoota ikkineemmo gede maganye yeemmo. Baalanka qooxeessa baalinkera ikkanno gede assine latinsammora, jiroonsi’nammora dandiineemmo. Kinsoommotenni kinsoommokki jironke roortanno; loonsoommohunni loonsoommokkihu bati’ranno.
Oosose mimmito macciishshitenna ayirrisante, keerunninna baxillunni heedhanno gobba gutunni ijaarreemmo gede musliimoota calla ikkikkinni baalunku
amma’no harunsaano ayirrinyunni xa’meemmo.
Itophiyu hiikku coyinnino aleenni techo hasidhannohu ayirrisamanna baxamaati. Wole kakkallammora ikkikkinni wolootaho yine kakkalammammoraati. Wolu reyo reynammoraati. Sannate albaanni masaalaanchu Ibrahiimi amma’nosi daafira jifaminte gede baala ninkeno techo gobbanke daafira yine jifote aana hee’noommo. Keere buuxisate, buximate giddonni fulate, miinjanke lossate, daganke jiroonsate sharrote aana hee’noommo. Kiphamme ikkikkinni hasaambe, saamme ikkikkinni beeqqine, xixxiiwamme ikkikkinni kaa’lamme gobbankera loonsummoro jifonke huluullo nookkiha qeelletenni fulleemmo. Ninke kakkalamme Itophiya kaajjinsheemmo. Masaalaanchu Ibrahiimi dhagge ilama baalate ikkite miliyoonoota baalante kalqenni Arafu gaarira gamba assannonte gede baala; ninke dhaggeno ilamate ikkite miliyoonoota baalante kalqenni Itophiya widira xuruurannonsata ammaneemmo.
Iid Mubaarek!
Dancha Iid Al Adaha ayyaana!
Itophiyu oosose sharronni ayirrite hegerera heedho
Kaaliiqi Itophiyanna dagase maassi’ro!
Ella 20/2015 M.D
Bakkalcho Ella 22, 2015
