Amsaalu Felleqe
Hawaasa:- Sidaamu qoqqowi poolisete komishiine umikki yannara haaru garinni tantanneenna qajeelsha harunsitanni keeshshitinori Poolisete Maarching Baande miilla sai Sambatu barra maassiinsoonni.
Hawaasi quchumira akkala Istaadiyeemera harinsoonni maassote amuraatira leellinohu qoqqowu pirezidaantichi kalaa Desta Ledamo coyi’ranni; qoqqowu dagaha latishshunna ga’labbote xa’mo buixisiisate sa’u muli dirrara hala’ladda loossa loonsoonni.
Kuri loossa mereerinni mitto ikkinohu ga’labbote bissa kaajjishate loosinni qoqqowu poolisete Maarching baande haaru garinni tantanne qajeelsatenni dagate ammanamatenni soqqantanno gede maassiinsoonni yiino.
Qoqqowunna qooxeessu dagoomi latishsha buuxisiisateno balanxe ga’labbo garunni agarsiisa hasiissanno yiinohu Pirezidaantichu kalaa Desta; konnirano, qoqqowoho duuchu handaari lopho buuxisiisate loossara Maarchinge baande miilla mootimmate waatira ikkite dagooma latishshahonna ga’labbo agarantanno gede kakkaysate ragaanni luphiima qeecha fultannore ikkansa huwachishino.
Qoqqowu Poolisete komishiine komishiinerichi Shimellis Toomaasi tenne yannara coyi’ranni; qoqqowu dagaha latishshunna ga’labbote hasatto hedote giddo worino garinni kaajjado ga’labbote wolqa gatamara dandiinoonni yiino.
Sa’u lame dirrara Addis Ababaho IFDR Gargarooshshu olanto Seesiqalote dayrekitoreetera qajeeltanni keeshshitinori xaphooma 94 Maarching baandete miilla faajjetenni maassantinoha ikkanna; kuri mereerinni 20 meentoho.
Bakkalcho Ella 22, 2015
