Abbebech Maatewoos
Addis Ababa:- Sidaamu qoqqowira sa`u 11 agannara daddalu amanyoote harunsitinokki shoole kume 23 daddalu uurrinshuwa aana seeru qaafo adhinoonnita qoqqowu daddalunna industirete biiro egensiissu.
Sidaamu qoqqowu daddalunna industirete biiro sooreessi kalaa Ashshaagire Jembere Itophiyu pireesete uurrinshara coyi`rino garinni; baajeettete dirinni sa`u 11 agannara qoqqowoho daddalu amanyoote harunsitinokkinna waagu lexxo iibbabbishshanno shoole kume 23 daddalu uurrinshuwa aana qaafo adhinoonni.
Dagoomu beeqqonni qoqqowoho seeriweelo daddalinni babbakkinonna laalcho maaxxanno hattono yannanna geexaanote wolqa hedote worinokki garinni luphiima waagu lexxo assitanno daddalu uurrinshuwanna hallanyootu aana daddalu amanyooti fajjanno garinni seeru qaafo adhinoonni yiinohu kalaa Ashshaagire; assinoonni qorqorshinni 60 miliyoone birre ale mootimmate eo assinoonni yiino.
Kalaa Ashshaagire xawishshi garinni; daddalu fajjo haaroonsitinokki, daddalu fajjo adhitukkinni loossanno, daddalu loosinsa aana allaggicho coye karsiisatenni hirtanno, luphiima waagu lexxo assitanno daddalaano hattono laalcho maaxatenni waagu lexxo iibbabbishshanno bissanna uurrinshuwa aanaati qaafo adhinoonnihu.
Kalaa Ashshaagire ledeno egensiisino garinni; adhinoonniti seeru qaafo woxu qorishinni hanafe daddalu fajjo ho`late geeshshaati.
Assinoonni qorqorshinna qaafonni shoole hallanyooti daddalu fajjonsa wo`munni wo`ma hoolloonni yiinohu sooreessu; ledotennino woxe qorichishante qorophishsha adhitino hallanyooti nootano huwachishino.
Kalaa Ashshaagire xawishshi garinni; daddalu amanyoote harunsenna seera agare harate widoonni qaafo adhinihu gedensaanni woyyino garinni dikko ga`labbisate looso loosa dandiinoonni.
Daddalu amanyooti gobbaanni afantanno daddalaano hattono dallaalootu seeru hundaanni hossanno gede dagoomu reqechishanno gede huwanyo aate looso hala`ladunni loonsoonni.
Wole widoonni,qoqqowoho waagu iibbabbo ga`labbisate laalchu hasattonna shiqisho taashshate laalchonna laalchimma lossate aana illachunni loonsanni hee`noonnita xawisinohu sooreessu; qoqqowoho nooha waagu iibbabbo ga`labbisate hasattonna shiqisho hedote worino laalchu shiqisho aana illachunni loonsanni afammanni yiino.
Qoqqowu gobboomu deerrinnino ikko kalqete deerrinni kalaqaminoha waagu iibbabbo kaima assatenni gobbate gede waagu iibbabbo ga`labbisate worroonni hedo loosu aana hosiisanni noota kalaa Ashshaagire xawise; mittimmate loosi maamarra widoonni giwirinnunnitanna babbaxxino laalchubba laashshaano geexaanote shiqishshanni afantannota egensiisino.
Kalaa Ashshaagire xawishshi garinni; qarunni waagu iibbabbo ga`labbisate dandiinannihu laalchimma ledatenninna handaarunni wodanchinanni seeriweello assootubba qorqoratenniti. Konni kaiminnino qoqqowoho laalchimma lossatenna seeriweello assootubba qorqorate ragaannino qoqqowunni hanafe olluu geeshsha loossa loosantanni afantanno yiino.
Bakkalcho Ella 22, 2015
