Amsaalu Felleqe
Hawaasa:- IFDR Pirezidaantitte Sahileworq Zewudenna Sidaamu qoqqowi pirezidaantichi kalaa Desta Ledamo laynki
gafi haanju harumi amuraatinni, way jiro bissa daafammetenni gargarate sa’u Qidaamete barra Hawaasi Garbi qooxeessira haanja harumansa wortino.
Pirezidaantitte tenne yannara coyidhanni; chigginye kaasa calla ikkikkinni way bissanna jiro ledo noose xaadooshshi kaajjado ikkinota huwatatenni qooxeessa daafammetenni gargara hasiissanno yitino.
Gobbankera dubbu doogimale ikkino garinni dolamanna qooxeessu mulluugamate kaiminni lolahunna dano kalaqantanna; hattono bushshu hoshooshammenna moolle kalaqamasenni duucha yannara kalaqamu aana gawajjo iillitanni keeshshitino.
Konni qarrinni fulateno haanju harumi amuraatinni chigginye kaasa luphiima horo nooseta kayisse; ‘’Chigginye kaasatenni way jironke garunni agarantanno gede assa hasiissanno’’ yitino.
Umi gafi haanju harumi loossanni qooxeessu agarooshshira calla ikkikkinni dagoomunniha sagalete wowe buuxisiisatenna gobbaydi dikkora sonkanni laalchono hala’ladunni laashshate dandiinoonnita coyidhino.
Sidaamu qoqqowi pirezidaantichi kalaa Desta Ledamo isi widoonni; qoqqowoho haanju harumi umikki gafinni baca miliyoonenni kiirranni chigginye kaasa dandiinoonni yee; laynki gafinni kayinni mixote aleenni kaasa dandiinannita sa’u yannanni afi’noommo rosichi leellishanno yiino.
Bakkalcho Ella 22, 2015
