Qiddist Gezaheny
Addis Ababa:- Isliminnu amma’no harunsaano Iid Al Adaha ayyaana mittimmatenna baxillunni ayirrissannonte gede Itophiyu baalunkuri aleenni techo hasidhannohu, ayirrisamanna baxamaati yaanni xaphoomu ministirchi dokter Abiy Ahimed huwachishi. Xaphoomu ministirchi 1444ki Iid Al Adaha ayyaanira hawalle iillishino’ne yaanni sokka sayisino.
Xaphoomu ministirchi dokter Abiy Ahimed isliminnu amma’no harunsaanora 1444ki Iid AL Adaha ayyaana lainohunni sayisino sokkanni; Arafu ayyaana wo’mante kalqenni gamba yitinori amma’note harunsaano mittimmatenni ayirrissanno. Qansichimmansanna ayimmansa babbaxxitinota ikkiturono, baalunku heddannohu Islaama ikkansaati. Babbabbadannonsare habbe xaaddinore, mittoo’mitinore heddanni mitto ikkitanno.
Ninkeno babbaxxineemmorira ikkikkinni xaandeemmorira, xixxiiwammeemmorira ikkikkinni gamba yineemmorira, halammeemmorira balaxo uyine mitte jawa daga ikkino. Babbaxxitino basenni dangummorono, babbaxxitino ayimma heedhunkerono, addi addi afoo coyi’nummorono, babbaxxitino amma’no heedhunkerono Itophiya yinanni woyte mitto ikkino yiino.
Kuni qachi, tini base anete yaa agurre, Itophiyu ninkeho yineemmo qansoota ikineemmo gede eeggo yeemmo yiinohu xaphoomu ministirchi; baalanka qooxeessa baalunkura ikkanno gede assine latinsammora, jiroo’minsammora dandiineemmo. Kinsoommohunni kinsoommokki jironke roortanno; loonsoommohunni loonsoommokkiti roortanno yiino.
Oosose macciishshantenna halante; keerunna baxillunni heedhanno gobba mitteenni gatamarreemmo gede Isliminnu ammanaano calla ikkitukkinni baalante amma’no harunsaano ayirrinyunni xa’mannota xawisino. Itophiyu baalunkuri aleenni hasidhannohu ayirrisamanna baxama ikkinota huwachishinno.
Dirrate albaanni masaalaanchu Ibrahimi amma’nosinni qarru iillinosinte gede ninkeno techo gobbanke daafira qarru aana hee’noommo yinohu xaphoomu ministirchi; keere buuxisate, buximatenni fulate, miinjanke lossate, daganke jiroo’misate sharrote aana hee’noommo. Kiphamme ikkikkinni hasaambe, saamme ikkikkinni beeqqine, xixxiiwamme ikkikkinni kaa’lamme gobbankera loonsummoro xaadinonke qarra mitte huluullo nookkiha qeelletenni sa’neemmo yino.
Xaphoomu ministirchi xawishshi garinni; gobbanke babbaxxitino yannara addi addi qarri xaadinose. Sa’nanniha lawannokki qarri yanna yannantenni xaadiserono qarranna mitiimma aante aantensanni sa’e, albaagge qaaffanni afantanno. Qarru bati’ri yannara, qansootise goofimarchu kakkalo baatate badhera di higgino. Jajjansa calla ikkikkinni lubbonsa sayisse aate dimarartino. Itophiya techora iillishshinoseri oosonsa gattukkinni kakkaltinori oosose ikkansa wo’manka woyte kullanni hee’nanni dhaggeeti. Itophiyu daga umonsano kakkaltanno. Baxxannoreno gobbansara yite sayisse uyitanno. Techo jawa kakkalooshshu ayyaani aana uurrine lamenkare ayirrinyunni qaangeemmo.
Gobba gobba ikkitannohu yannansa, wolqansa, egennonanna lubbonsa kakkalote shiqishshannori lowo ooso kalaqi’ra dandiituro ikkinota xawise; mittu woleho reyaa, mittu woleho aamama, mittu woleho beeha, mittu woleho kakkalo baatate kalqete qajeelle kaajjado hale aana uurrissinoti yiino.
Gibbo, gaance, babbadamanna xixxiiwama kakkalama noowa diheedhanno yinohu xaphoomu ministirchi; kuri gaaggaadaa’mate gumaati yino. Togoohu bayiru kakkalamatenni wo’mino baxilli ayirrisamanno ayyaani aana , hiikkono ikkiro gibbo rosiisa saalaho. Babbadamanna bebbeehama kula saalaho. Itophiyu baalunkuri aleenni xa hasidhannohu baxillenna dagase mittimma ikkinota sokkasinni sayisino.
Bakkalcho Ella 22, 2015
