Amsaalu Felleqe
Wondo Gennet:- Sidaamu qoqqowo ikke safami kawa dagoomunnita latishshu hasatto wonshate loonsanni hee’noonnita Sidaamu qoqqowi pirezidaantichi kalaa Desta Ledamo coyi’ri.
Sa’u lamalara hananfoonni qoqqowoho babbaxxitino pirojekitubba ijaarshanna safote latishshuwa goofeenna maassiinse dagoomaho owaante uytanno gede assate amuraati Ella 27/2015 geeshsha sufannotano pirezidaantichu qummeessino.
Qoqqowoho babbaxxitino qooxeessubbara ijaarsinoonni pirojektuwa mereerinni Wondo Genneti quchumi gashshootira umi dirimi Hospitaale, xalalu anganni way pirojekituwa, doogganna buussano sa’u muli barruwa giddo maassiinse dagoomaho owaantete fano assinoonnireeti. Wole widoonnino hallanya dureeyyenninna mootimmatenni loonsoonn rosi minna hattonni.
Wondogenneti quchumira Pirojekituwa maassi’re faninohu Pirezidaantichu kalaa Desta Ledamo tenne yannara coyi’ranni; soorrote mootimma gobba massaga hanaffunna Sidaamu qoqqowo ikke
tantanami kawa hala’lado latishshu loossa loosantino yiino. Dagoomunnita seeda yanna latishshunna danchu gashshooti xa’mora deerru deerrunkunni dawaro qollanni horaameessimma buuxinsiinsanni hee’noonni
yiinohu Pirezidaantichu kalaa Desta; qoqqowoho baxxinohunni sa’u sase dirrara looonsoonni loossanni harancho yanna giddo illete leellanno guma maareekkisiisa dandiinoonnita egensiisino.
Wondo Genneti quchumi gashshootinna qooxeessu daga xa’mitanni keeshshitinoha seeda yanna latishshu xa’muwara barraho maassiinsoonniti duuchu handaari owaantenna horo uytanno pirojekituwa deerru deerrunkunni dawaro qolate dandiinoonnita ikkaseno huwachishino.
Dagoomunniha horonsi’raanchimma lossatenna buxima hunate illachiinshe loonsanni hee’noonnita coyi’rinohu Pirezidaantichu; qoqqowoho babbaxxitino qooxeessuwara ijaarsinanni keeshshinoonnita duuchu handaari horo uytanno pirojekituwa maassiinsanni hee’noonniha ikkanna; qoqqowu safama korkaata assatennino gattino pirojekituwa Ella 27/2015M.D geeshsha maassiinse dagoomaho owaantete fano assinannita qummeessino.
Barrahono 120 miliyoone birra fulo assine ijaarroonnita Wondo Genneti umi dirimi Hospitaale maassiinsoonniha ikkanna; Hospitaale 300 kumi ale ikkanno qooxeessu dagoomira isilancho fayimmate owaante uytanno yine hendannita xawinsoonni.
Sidaamu qoqqowira xaa yannara 1 Riferaale Hospiataale, 5 xaphooma hattono 15 umi dirimi Hospiataalla xaphoomunni 21 Hospitaalla nooha ikkanna; isilancho fayyimmate owaante dagoomaho iillishate deerru deerrunkunni fayyimmate uurrinshuwa halashshate loossa loonsanni hee’noonnita Qoqqowu Fayyimmate Biiro Sooreette Dr. Selaamaawiti Mangashiti tenne yannara xawissino.
Fayyimmate uurrinshuwara xaggate anje tiratenna hafanfarre ajishateno illachiinshe loonsanni hee’noonni yitinoti Biirote Sooreette; qoqqowoho xaa yannara 80 dagate xagichu minna fannoonnitanna muli barruwa giddo kayinni 7 dagate xagichu minna fanate loonsanni hee’noonnita egensiissino.
Wondo Gannati Quchumi gashshootira 65 miliyoone ale ikkanno woxe fulo assatenni ijaarroonniha xalalu anganni way pirojekite, giddo doogga, rosu uurrinshuwa hattono buusa maassiinsoonni.
Maassote amuraati aana IFDR Wayinna wolqate ministere ministirchi Dr Injiiner Habtaamu Ittafa ledo woloottuno Federaaletenna Sidaamu qoqqowi luphiima mootimmate loosu massagaanonna ayirrada woshshatto assinoonninsa wosinna leeltino.
Bakkalcho Ella 22, 2015
