Amsaalu Felleqe
Addis Ababa:- Wondo Gannatete quchumi gashshooti amandoonnihu eote dirinni mixote aleenni eo gamba assa dandiinota Quchumu Eote Biilloonyi sinu borro mini egensiisi.
Quchumu gashshooti Eote biilloonyi sinu borro mini sooreette Dukko Seble Yilma Itophiyu pireeste uurrinshara xawissino garinni; Wondo Gannatete quchumi gashshoote qoqqowoho afantannori wolootta quchummanni baxxinoha assannosihu, mootimmate baajeettenni irkisamannoha ikkikkinni umisinni eo burqisatenni umisi baajeettenni galannohanna mootimmate kaazinira eessannoha ikkasiiti.
Quchumu gashshootira eote bue ikkinori mereerinni babbaxxino giwirinnu laalchi dikko nooha ikkanna; eo gamba assate amanyootino kaajjado ikkasiiti yitino; Sooreette. Amandoonnihu 2015M.D baajeettete dirinnino quchumaho 195.03 miliyoone eo gamba assate mixi’noonniha ikkanna; eo gamba assate amanyoote kaajjishatenni 336.5 miliyoone birra eo gamba assa dandiinoonnita xawissino.
Kunino, diru mixo gumulshi xibbuunni 173% ikkinota egensiissinoti dukko Seble; gamba assinoonni eo diroho mixi’noonni garinni heewinsiro mixote aleenni 141.5 miliyoone birra lexxo leellishinota qummeessitino.
Quchumu burqisanno eonnino dagoomaho hasiissannota babbaxxitino safote latishshuwa loonsanni dagooma horaameeyye assinanni hee’noonnita qummeessitinoti Biilloonyu Sooreette Dukko Seble; quchumu gashshooti eo yanna yannantenni lexxitanni dagginota kulte; albillichono eote handaarra halashshate kaajjinshe loonsannita egensiissino.
Yanna yannantenni lexxitanni dagginoti quchumu teessaano hasatto; latishshunna babbaxxitino xintu latishshuwa hattono owaantete handaarra halashshate xa’mora hasiisanno garinni dawaro qolatenna quchuma hee’ratenna loosi’rate woyyaawinoha assateno illacha tunge lonsanni hee’noonnitano ledde xawissino.
Bakkalcho Ella 15, 2015 M.D
