Amsaalu Felleqe
Addis Ababa:- Xaphoomu ministirchi Dr Abiy Ahimedinni uurrinsoonniti Itophiyu Sagalete amanyooti Ministirootu Istiringete komite safote songo bero harinsoonni. Songote aana hasaawa assitinoti IFDR Fayyimmate ministircho Dr Liya Taaddese coyidhanni; sa’u dirrara sagalete amanyooti aana illachishshino loossa babbaxxitino doogganni loonsanni keeshshinoonni yitino.
Istiringete komite safote loossa qinaawino garinni mixi’rate, massagatenna gumulate dandiisiisanno yitino. Gibirinnu ministirchi Dr Girma Amente isi widoonni; maatenniha sagalete wowe buuxisiisa mitte gobba utuwimma agarsiisate ledo xaaddanno yiino. Ikkinohura, uurrinsoonniti ministirootu Istiringete komite Itophiyunniha sagalete amanyooti tantanote soorro abbate noo dhuka baala qineessine loosu aana hosiisate kaa’lannota xawisino.
Istiringete komite Itophiyunnita sagalete amanyooti harinsho, taaltino sagale istiraateejenna Seqoxu yawo qineessatenna massagate, polisenna seeru hanqafubba massagate uurrinsoonnita xawinsoonniha ikkanna; qoqqowubbate mootimmuwa irkisate, loossate gumulsha harunsatenna keenate loossa gumultanno.
Ledoteno, woxu bue hasatenna loossate baajeette gaammanni gede harunsatenni Itophiyu sagalete amanyooti loossa gobboomunna kalqoomu deerrinni gummame ikkitanno gede loossanno. Itophiyu sagalete amanyooti ministirootu Istiringete komite 14 Ministere loosu minna hanqaffinoha ikkanna; Gibirinnunna Fayyimmate ministirootinni massagantanno yinoonni.
Bakkalcho Ella 15, 2015 M.D
