Qiddist Gezzaheny
Jawiidi rosu uurrinshuwanni rosonsa jeefisse fultanno rosaano gobboomu ikkadimmate keeno fonqolo adhite fultanno gede assa qarunni suwashshimmate xa’mo qoltannotanna rosu islanchimma aana leellanno qarra tirtanno yine ammannannita rosiisaanchunna Bizinesete amaalaanchi kalaa Beqqele Abirihaamihu xawisi.
Hawaasi Yuniversite Akkawuntingetenna womaashshu rosu goli rosiisaanchinna Bizinesete amaalaanchi kalaa Beqqele Abirihaamihu Itophiyu Pireesete Uurrinsha ledo assino hasaawinni; 2015 rosu dirinni Yuniversituwatenni rosonsa jeefisse fultanno rosaano gobboomu ikkadimmate keeno buuxo fonqolo adhite fonqolo sa’uhu gedensaanni maassantanno gede assa gobbankera rosu islanchimma aana noo qarra tiratenna suwashshimmatenni loosu giddora e’’ate dancha kaa’lo assanno yine hendannita coyi’rino.
Hattono rosaano rossino rosinni mageeshsha ikkadda ikkitinnoro keennannihanna ikkadimmatenni loosu giddora e’anno gede assate jawa kaa’lo assannoha ikkasino lede xawisino. Rosiisaanchu xawishshi garinni, digire adhiha baala rosino handaarinni ikkadoho yaa didandiinanni; fonqolu mittu rosaanchi adhino qajeelshi aana noosi ikkadimma keennanni hayyooti yiino.
Baxxinohunni hallanyu kollejjuwara uyinanni rosi woxu aana safaminoha ikkasi qummi assinohu kalaa Beqqele; konninnino duucha woyte hallanyu kolleejuwanni digire adhite fultino rosaano ikkadimmate anje aana qaxaraanotewiinni koffeenyu ka’’annota kayse; togoori mite mite hallanyootu kolleejuwa daddaloho uurritinore ikkansa bikkinni islanchimma hedote giddo wortinokkire ikkansa buuxisino.
Kunni garinni woxu aana safantinore ikkansanni rosaanonsara luphiima guma wonshite jeefote woraqata uyitannota kulino. Kunino luphiimu gumi noonsa rosaano qaxadha hasidhanno uurrinshuwara togoo kolleejuwanni fultino heewisamaano loossukkinni afidhino guminni egennotenni ikkadda ikkitukkinni loosu giddora e’’ate kaayyonsa luphiimate; Tinino wolootu mootimmate Yuniversitenni fultinorinna egennonsanni loose mereerima guma amaddino rosaano kaayyo cuffanno harinsho ikkasenni taala noose hajooti yiino rosiisaanchunna Bizinesete amaalaanchi hasaawisinni.
Konni daafira gobboomu deerrinni tayixe umikki yannara hananfannihu ikkadimmate buuxo fonqoli konnenna lawannoha rosu islanchimma aana leellanno qarra gatisate qeechisi luphiimaho yee; woxe gubbise qaxarama dandaannokkihanna egennosinni heewisame qaxaramanno rosaanchira jawa kaa’lo noosiha ikkasiiti kalaa Beqqele Bakkalcho Gaazeexi ledo assino hasaawinni xawisinohu.
Bakkalcho Ella 15, 2015 M.D
