Abbebech Maatewoos
Addis Ababa:- Wolayittu zoonera wirro oyimbarra wirro harinsoonnita dagate huuro jeefote guma Ella 19/2015 M.D faajje assinannita Itophiyu Doorshu Boorde egensiissino. Itophiyu doorshu boorde gambisaancho Burtukaan Mideqisa; Wolayittu zoonera wirro harinsoonniha dagate huuro lainohunni xawishsha uytino.
Xawishshunnino dagate huuro assinoonni qixxaawo garinni keerunni jeefinsoonnita kultino. Dagate huuro uyinanni harinshonni xaaddino boode qarrubbara gari tiro aatenni dooraano qoossonsa garunni horonsidhanno gede assinoonnita gambisaancho uytino xawishshinni buuxisiissino.
Dagate huuro jeefote guma amandoonni mixo garinni Ella 19/2015 M.D faajje assinannita xawissinoti gambisaancho; dandaamirono hakkonni kawa xawisate boordenna loosaasine jawaantetenni loossannotano egensiissino. Gambisaancho xawishshisenni yitino garinni; zoonete wirro harinsoonniti dagate huuro gumaame ikkitanno gede boorde mannu wolqanninna loojistiikisetenni ikkado qixxaawo assatenni loosu giddora e`ino.
Dagate huuro dooraanote borreessammenna huuro uynanni amanyooti mitte yanna giddo harinsanniha ikkasinni gumaho doorshu mereershuwa halashshate looso gumulloonnita coyidhino. Konni garinni, konni albaanni noohunni doorshu mereershuwa 8ni 12 widira hattono 1 kume 112 ikkitinore doorshu mereershubbara, 1 kume 812 widira lossatenni harinsho gumulloonnita kultino.
“9 kume 60 doorshu gumulsiisaano fille ikkado qajeelsha uyneennansa harinsho gumulsiissino” yitino. Huuro uynanni saate gooffuhu gedensaanni qoossonsa horonsi’ra hasiissannonsa dooraano dirante uurritinohura seeru garinni mitte saate ledatenni gumulloonnita coyidhino.
Gambisaancho ledotenni, doorshu harinsho ammansiissannotanna dimokiraase leellishshannota ikkase harunsitannore gobbate giddonni lame uurrinshuwara boorde afamishsha uyteennansa 168 harunsaano bobbaasse harinsho harunsitinota xawissino.
Barraho dooraanote borreessammenna huuro aate harinsho mitte yannanni gumulantinota kayissinoti gambisaancho; konninni, Boorde loosose gumultanno yannara xaaddino qarrubba nootano coyidhino. Qarrubbate mereerinnino baca mereershuwara qooxeessaho lee agana heeransa buuxissanno seeru wodho wonshitinokkirinna seeru ayimmate xawishsha heerinsakkinni huuro aate dagginori afantinota buuxissino.
Boordete seerinna biddissu garinni dooraanonniti doorate qoosso agarantanno gede hedatenni teessaano ikkansa buuxissannore sase farci’raanonna wolootta sanadda buuxatenni amaale aatenni beeqqitanno gede assinoonnitano coyidhino.
Hattono boode doorshu mereershuwara dirinsa 18 woro ikkitino dooraano afamansa wole qarra ikkinota kayisse; “Hallanyootu seeru fajjannonsakkihura beeqqitannokki gede assinoonni” yitino. Ledoteno, Sooddote gaangaawira afamanno Dilbo Awixiro 1 doorshu mereershi aana huuro aate dayno gumulsiisaanchi fano ayimmate xawishsha wonshanni beehanna xawoho amande buuxo hananfoonnita coyidhino.
“Humbo doorshu mereershira gumulsiisaancho ikkikkinni gumulsiisaancho yitanno baaje suxxe eate wo`naalino hallanyi amadamasinna hattono Gesubba 01 doorshu mereershira onte seeriweelo teessote ayimmate xawishsha amadde afantino hallanyoota doortannokki gede assinoonni” yitino. Itophiyu odoote owaante duduwi garinni; luphiima ikkitino seerimalimma leeltukkinni dagate huuro aate harinsho keeraawino garinni gumulante gooffinota Gambisaancho egensiissino.
Bakkalcho Ella 15, 2015 M.D
