Qiddist Gezzaheny
Addis Ababa :- Heewotenni ikkikkinni halamate aana safaminoha kaajjado Federeeshiinete amanyoote gatamara hasiissannota Federeeshiinete amaale mini Qaru Songaafichi kalaa Agenyehu Teshaageri xawisi. Qoqqowubba fushshitanno seeri qoqqowinsara uyitanno horo bikkinni calla ikkikkinni wolootu qoqqowubba aana iillishshanno xiiwo hedote giddo wortara hasiisanno yiino.
Federeeshiinete amaale mininna qoqqowubbate gutu amaalammete bare harinsi yannara hasaawa assinohu Songaafichu kalaa Agenyehu Teshaageri; hasaawunniti qara hedo mootimmuwate xaadooshshi massagooti. Dagatenna dagoomunnihu Federaalete amanyooti bowiranno gede assatenni seerunnihunna uurrinshu xaadooshshi hee’ranno gede assa hasiissanno yiino.
Konni albaanni mimmitu ledo harinsanni keeshshinoonni xaadooshshuwanni leeltino jawaante sufisiisatenni xaaddara dandiitanno foonqe wonshine qoqqowu mootimmuwa noonsa xaadooshshe roore kaajjishate dandiisiisanno hasaawa harisa hasiissannonsa yiinohu kalaa Agenyehu; kunino Federeeshiinete amaale mininna qoqqowubba lallawunni tittirre uyinoonninsa loosinna yawo garinni roore qeechansa fultanno gede dandiisiisate illachishinoha ikkasi xawisino.
Songaafichu xawishshi garinni; Federaalete amanyooti giddo mootimmuwate mereero harinsanniti mimmitu amaalammenna assinanniti halamate sumimme qoqqowu mootimma mereero kalaqantara dandiitannota sumimmete hoonge gatisate, gaance kalaqanturo hasaambe tirate, poolise, Istiraateejenna mixo mittoo’mitanno gedenna baalante qoqqowubbara shiqqi yitino gumulo heedhanno gede assate dandiisiisanno.
Gutu hedo amande kaajjishatenni yanna yannatenni bowirtanni hadhanno harinsho diriirsa qara hajo assine adhinanni gede assinannite yiino. Heewotenni ikkikkinni halamate aana safaminoha Federeeshiinete amanyoote gatamarate qoqqowubbate mereero keeraanchu xaadooshshi hee’ra hasiissanno yiinohu kalaa Agenyehu; kaajjado Federaalete amanyoote halashshate hasaawu, sumimmetenna taalleenyu aana safaminohu Federaalete amanyooti hee’rara hasiisannota coyi’rino.
Qoqqowubbate seera fushshate biilloonye uyinoonninsa yiinohu Songaafichu; fushshitanno seeri qoqqowinsara aanno horo garinni calla ikkikkinni qoqqowubbate aana iillishanno xiiwo hedote giddo worinoha ikka hasiissannota huwachishino. Federaalete uurrinshuwa aana hiittoo kaa’lonna xiiwo kalaqqanno yitanno xa’mo hedote giddo woratenni ikka noosi. Ba’rete aana qoqqowubba noonsa hedo kayisatenni hasaawa assitannotanna gutu hedo amaddannota ikkase qummeessino.
Songaafichu, dagatenna dagoomunnihu Federaalete amanyooti rumuxxanno gede Federaalete mootimmanna qoqqowubbate hattono uminsanni qoqqowubbate mereero iillanni keeshshinohu rosaminokki xaadooshshinni leeltino jawaante sufisiisa hasiissanno. Kalaqantinorinna albillitte kalaqantara dandiitanno foonqe wonshatenni Federaalete amanyooteno ikko gobbate dimokiraasete amanyoote murate lallawu kiiro 1231/2013 kaajjite loosu aana hossino yiino.
Federeeshiinete amaale mini mootimmate xaadooshshi, dimokiraasete mittimmanna bayiridi seeri rosiishshi uurrinshu komite borreessaancho dukko Banchiyirga Mallese; Itophiyu Federaaletenna dimokiraasete mootimmate tantano amanyoote harunsitannota ikkasenni sufo noo keere halashshate, wowe noose dimokiraase buuxisiisate, rahino miinjanna dagoomittete latishsha sufisiisatenna mitto poletikunna miinju dagooma gatamarate uurrinshunnihu mootimmate xaadooshshi heera hasiissanno yiino.
“Mootimmate xaadooshshi rosicho Itophiyu aantino faashora” yaanno uminni shiqishinohu Federeeshiinete amaale mini Istiraateejikete hajubba qineessonna laynki borrote mini sooreessi kalaa Belay Wogeeshsha; Federaalete amanyooti akata Fqoqqowu mootimma mimmitu xaadooshshe hasidhanno.
Kunino biilloonyu Federaalete mootimmanna qoqqowubbate mereero assinannihu biilloonyu beehaachi hee’rasinniiti. Konnira, Federaaletenna qoqqowu mootimma amaalamatenna hasaawatenni loossanno injoo hee’ra hasiissanno; bareno Federaalete amanyooti lubbo afi’rinoha ikkanno gede luphiima qeecha afidhino.
Bakkalcho Ella 15, 2015 M.D
