Abbebech Maatewoos
Addis Ababa:- Bero kaimanke la’’a dandiineemmore, techo kaajjine loonseemmorenna ga`a hedote giddo wora dandiineemmore ikka noonke yaanni Xaphoomu ministirchi Abiy Ahimed coyi`ri. Xaphoomu ministirchi Abiy Ahimed Sayinsete muuziyemera fannoonniha gobboomu Fayyimmate reqecco towaatino.
Xaphoomu ministirchi Dr.Abiy Ahimed Fayyimmate ministere qixxeessaanchimmanni Addis Ababaho Sayinsete muuziyemera harisa hananfoonni gobboomu fayyimmate reqecco qixxaawo aana coyi`rino garinni; xaa yannara fayyimma kalqe bidhachishshannonna aanteno luphiima mitiimma ikkitanno hajubba mereero mittoho.
Fayyimmate hajo Itophiyahono ikkiro bidhachishshanno yinanninna illacha uyneennansa loosantanni noo umi gobboomu hajubba mereero mittoho yiinohu Xaphoomu ministirchi Abiy; konne kaajjinshe sufisiisa hasiissanno yiino.
Qansootuno fayyimmate handaarinni noo akata huwatatenni saga`late amanyoote woyyeessatenni, bisu guunte millimmo assatenninna xaphooma hee`nanni hayyo seekki’ratenni fayyimmate illacha aa heedhannonsa yaanni qummeessino.
Haanja haruma labbinore fayyimmate ledo suwashshu xaadooshshi hee`rannonsa assootubbano kaajjishe sufisiisa hasiissannota Xaphoomu ministirchi Abiy xawisino. Xaphoomu ministirchi Abiy hasaawisinni; “Bero kaimanke la“a dandiineemmore, techo kaajjine loonseemmorenna ga`a hedote wora dandiineemmore ikka noonke” yiino.
Duuchankare techo la`neemmoha ikkiro ilamate tareessineemmohu danchu coy dihee`ranno yiinohu Xaphoomu ministirchi; aanteteno gobbate gede noo qarrubba huwatte umose hakko qarrinni fushsha dandiitanno ilama kalaqa agarrannita huwachishino.
Togoo reqecco qixxaawaseno fayyimmate handaarinni nooha yannate akata afatenna hasaawate waalcho fantannoha ikkase xawisatenni Sayinsete muuziyeme uurraseno ilamate tareessannoha gobboomu reqecco gumulate mixi`ne qixxeessinoonniha ikkasinni; tenne qixxaawo aana dukkisamatenni gobbate fayyimmate handaari noo deerra huwata baalunkuwiinni agaramannoha ikkanno yiino.
Qixxaawote aana ha’nura egennonni hanafe yanna kalaqqinonsa Artefishaalete Intelijense xagisote tekinoloojubba iillitino deerranna hodhinota lophote doogga hattono albillicho fayyimmate illachuwa leellishshannonna baatooshshiweelo fayyimmate buuxo lede wolootta hajubbano shiqqannoho.
Gobboomu fayyimmate reqecco Fayyimmate ministere Xaphoomu ministirchi borro mininna Itophiyu fayyimmate agarooshshi federeeshiine ledo halamatenni “Dagganno Ilama Fayyimma” yaanno massagote qaalinni qixxeessitinoha ikkanna; mittu aganira keeshshannoha ikkasino buunxoonni. Tenne yanna giddono 100 kume ale towaataano la’anno yine agarranni.
Bakkalcho Ella 15, 2015 M.D
